Kuri iki Cyumweru u Bwongereza bwatangaje ko bugiye kuba igihugu cya mbere kigiye gutangira guha abaturage bacyo urukingo rwa coronavirus rwakozwe n’inganda, Pfizer na BioNTech.
Inkingo za mbere zizahabwa abakora mu bijyanye n’ubuvuzi ndetse n’abarengeje imyaka 80 guhera kuri uyu wa Kabiri, itariki 08 Ukuboza, nk’uko byatangajwe na minisiteri y’ubuzima.
Inkingo hafi 800,000 nizo biteganyijwe ko zizatangwa mu cyumweru cya mbere nk’uko iyi nkuru dukesha VOA ikomeza ivuga.
Izi nkingo zakozwe na Pfizer na BioNTech zishobora kwemerwa no muri Leta Zunze Ubumwe za Amerika mu mpera z’uku kwezi, mu gihe u Bushinwa buteganya gutangira gukingira abaturage.
Ibiro Ntaramakuru by’Abanyamerika, Associated Press, byatangaje ko amamiliyoni y’Abashinwa bakora mu bijyanye n’ubuvuzi bamaze kugeragerezwaho urukingo kandi nta ngaruka ziragaragara.
Abantu basaga 66 ,700,000 bamaze kwandura icyorezo cya Covid-19, mu gihe abasaga 1,500,000 bamaze guhitanwa nayo nk’uko byemezwa na Kaminuza ya Johns Hopkins. Leta Zunze Ubumwe za Amerika nicyo gihugu kimaze kugira abantu benshi banduye basaga 14,500,000.
