Abahagarariye impunzi z’Abarundi zahungiye mu gihugu cya Tanzania kuri uyu wa Gatandatu ushize bandikiye Umunyamabanga Mukuru w’Umuryango w’Abibumbye, Ishami ryawo rishinzwe impunzi, UNHCR, ndetse n’Umuyobozi Nshingwabikorwa wa Human Rights Watch, basaba kobafashwa kwimurirwa mu kindi gihugu kuko barimo guhohoterwa bahatirwa gutaha ku ngufu.
Kopi y’ibaruwa yanditswe n’izi mpunzi urubuga rwa SOS Médias Burundi yabashije kubona, igaragaza ko ubuzima bwo mu nkambi zo muri Tanzania butakiri ubwo kwihanganirwa.
Sudi Mwakibasi, umuyobozi ushinzwe serivisi z’impunzi muri minisiteri y’umutekano ya Tanzania, yeruriye Radio Mpuzamahanga y’Abafaransa, avuga ko “Kuri ubu ibintu byarahindutse. Tanzania ntigishaka kugumana impunzi z’Abarundi ku butaka bwayo.”
Uyu yashimangiye ko iki gihugu kitazaba gishaka impunzi z’Abarundi nyuma ya 2021.
Abahagarariye impunzi z’Abarundi bavuga ko ibyo yatangaje bisa nko kwambura statut y’ubuhunzi impunzi z’Abarundi ziri mu nkambi zo muri Tanzania. Bati: “Baratekereza ko intambwe izakurikira ari ukubacyura ku ngufu.”
Aba bavuga ko igipolisi n’abayobozi ba Tanzania bavuzwe muri raporo z’imiryango mpuzamahanga irimo Human Rights Watch, ko ari bo bari inyuma y’ubugizi bwa nabi bukorerwa impunzi z’Abarundi.
Bati: “Turabizi ko impunzi zimwe zihitamo gutahuka, ariko ibi biterwa n’umutekano muke uri mu nkambi. Turasaba ko twimurirwa mu kindi gihugu cya gatatu. ”
Mu ntangiriro z’iki cyumweru, nibwo Umuryango uharanira uburenganzira bwa muntu, Human Rights Watch, washyize ahagaragara raporo ushinja abategetsi ba Tanzania kugira uruhare mu “ihohoterwa rikabije ry’impunzi z’Abarundi.”
Guverinoma ya Tanzania ntacyo irasubiza kuri iyi raporo.
