Prof. Sam Rugege wayoboye Urukiko rw’Ikirenga mu Rwanda, kuri uyu wa 7 Ukuboza 2020 yashyizwe mu Nama y’Ubutegetsi y’umuryango mpuzamahanga wa Weinstein International Foundation wunga abafitanye amakimbirane.
Kugirira Prof. Rugege iki cyizere, uyu muryango wabishingiye ku bunararibonye afite nk’uwamaze imyaka 16 ayobora mu Rukiko rw’Ikirenga rw’u Rwanda, agateza imbere ubutabera ndetse akanashyira imbere ubwunzi mu bari bafitanye amakimbirane, binyuze mu nzira y’ubutabera.
Umunyamategeko Danny Weinstein washinze uyu muryango, yahaye ikaze Prof. Rugege, ndetse agaragaza ko amwitezeho byinshi mu gukemura amakimbirane arangwa ku mugabane wa Afurika.
Ati: “Twishimiye ko Sam Rugege yinjiye mu nama yacu. Nyakubahwa wahoze ayobora Urukiko rw’Ikirenga ni umuntu wubashywe ku rwego mpuzamahanga mu bijyanye n’ubwunzi, gukemura amakimbirane n’ubwiyunge. Azafasha umuryango wacu kunga uturere twinshi muri Afurika nk’uko yabigenje mu Rwanda.”
Prof. Rugege yishimiye icyizere uyu muryango wamugiriye ndetse nk’uko abyifuzwaho, yawijeje gukora neza inshingano wamuhaye. Ati: “U Rwanda rwasaruye kuri gahunda zawo (uyu muryango), nanjye niteguye kugira uruhare muri ubu butumwa bukomeye, cyane cyane muri Afurika aho amakimbirane akomeje guteza ububabare bwakwirindwa no kuba imbogamizi ku iterambere.”
Weinstein Internation Foundation ni umuryango udaharanira inyungu, washinzwe n’inzobere mu gukemura amakimbirane no kunga abayafitanye. Ufite icyicaro gikuru i San Francisco muri Leta Zunze Ubumwe za Amerika, ukaba ukorera ku Isi yose.
Naho Prof. Sam Rugege ni umunyamategeko wakuye impamyabushobozi muri Kaminuza zitandukanye zirimo iya Makerere, Yale na Oxford. Yabaye Perezida w’Urukiko rw’Ikirenga mu Kuboza 2011, asimbuye Aloysie Cyanzayire. Yaje kuva kuri izi nshingano mu Kuboza 2019, asimburwa na Dr. Ntezilyayo Faustin.
