Dr Sezibera yahawe imirimo mishya muri Commonwealth

Umunyamabanga Mukuru w’Umuryango w’Ibihugu bikoresha Ururimi rw’Icyongereza (Commonwealth), Patricia Scotland, kuri uyu wa Gatanu yatangaje amazina y’intumwa zidasanzwe ze, zirimo Umunyarwanda Dr Richard Sezibera, zigomba guteza imbere indangagaciro n’amahame by’umuryango ku Isi hose.

Aba bantu uko ari bane bazibanda ku bintu by’ingenzi bigamije gushyigikira no gufasha ibihugu 54 bigize umuryango wa Commonwealth n’abaturage miliyari 2,5 z’abaturage.

Abantu bane bahawe inshingano ni:

Justin Munday wahoze ari umukozi mu biro by’Igikomangoma cya Wales, wagizwe Intumwa idasanzwe ishinzwe ibibazo by’imihindagurikire y’ikirere, ibidukikije, n’imibereho myiza y’ubukungu.

Dr Richard Sezibera, wabaye minisitiri w’ubuzima w’u Rwanda, yagizwe Intumwa Idasanzwe ubuzima n’uburezi. Inshingano ze zizibanda ku kugera ku Ntego z’Iterambere Rirambye (SDGs) mu bijyanye n’ubuzima, imibereho myiza n’ireme ry’uburezi.

Prof Praja Trevedi, wahoze ari umujyanama wa Guverinoma y’u Buhinde, yagizwe Intumwa Idasanzwe ishinzwe ishyirwa mu bikorwa ry’Intego z’iterambere rirambye. Azibanda ku ishyirwa mu bikorwa rya Gahunda y’Umuryango w’Abibumbye ya 2030 n’intego zayo 17 z’iterambere rirambye, harimo kurwanya ubukene no kugabanya ubusumbane.

Uwa kane ni Anne Wafula Strike, wagizwe Intumwa idasanzwe y’Umunyamabanga Mukuru wa Commonwealth ushinzwe uburinganire muri siporo. Uyu yahoze ari umukinnyi w’imikino ngoraramubiri y’abafite ubumuga. Azibanda ku guhuza imigambi ya siporo no gushyigikira ishyirwa mu bikorwa ry’intego z’iterambere rirambye mu bijyanye na siporo, amahoro, iterambere no kuzamura uburinganire mu bya siporo.

Mu ijambo rye nk’uko iyi nkuru dukesha urubuga rwa Commonwealth ikomeza ivuga, Umunyamabanga Mukuru wawo yatangaje ko yishimiye ko izi ntumwa uko ari enye zemeye gufasha umuryango guteza imbere indangagaciro n’amahame byawo kugirango uzabashe kugera ku ntego z’iterambere rirambye no gufasha miliyari 2,5 z’abaturage b’ibihugu bigize umuryango igihe bakeneye ubufasha.

Dr Richard Sezibera w’imyaka 56 ni umuganga wabyigiye, umudipolomate n’umunyapolitiki, wabaye Minisitiri w’ububanyi n’amahanga, asimbuye Louise Mushikiwabo, kuva ku itariki 18 Ukwakira 2018 kugeza ku itariki 04 Ugushyingo 2019 asimburwa na Vincent Biruta.