Inama y’Abaminisitiri yateranye kuri uyu wa 14 Ukuboza 2020, yafashe ibyemezo bikakaye birimo guhagarika imihango y’ubukwe, kugabanya umubare w’abagendera mu modoka zitwara abagenzi mu buryo bwa rusange no kugabanya amasaha y’ingendo; mu rwego kurwanya icyorezo cya Covid-19.
Minisitiri w’Intebe, Dr. Edouard Ngirente na Perezida Paul Kagame mu Nama y’Abaminisitiri
Ni inama yari yitezweho gushyiraho impinduka nyinshi, bitewe n’ubwiyongere bw’abandura icyorezo cya Covid-19 bumaze iminsi bugaragara hirya no hino mu gihugu; cyane cyane mu mujyi wa Kigali na Musanze.
Ingamba zafashwe
Inama y’Abaminisitiri yemeje ko guhera kuri uyu wa 15 Ukuboza 2020 kugeza ku wa 21 Ukuboza 2020, ingendo zibujijwe guhera saa tatu z’ijoro kugeza saa kumi z’igitondo.
Yemeje ko kuva tariki ya 22 Ukuboza kugeza tariki ya 4 Mutarama 2021, ingendo zibujijwe guhera saa mbiri z’ijoro kugeza saa kumi z’igitondo.
Amateraniro rusange harimo imihango y’ubukwe. Ubusabane n’ibirori bitandukanye, byaba ibibera mu ngo cyangwa ahandi hose byabujijwe.
Umubare w’abitabira inama ntugomba kurenga 30% by’ubushobozi bwo kwakira abantu abantu bw’aho bateranira, bose bakaba bagomba kwipimisha Covid-19 kandi bakubahiriza amabwiriza y’inzego z’ubuzima.
Ibikorwa by’inzego za Leta bizakomeza ariko buri rwego rurasabwa gukoresha abakozi batarenze 30% by’abakozi bose, abandi bagakorera mu rugo ariko bakagenda basimburana.
Imodoka zitwara abantu mu buryo bwa rusange zemerewe gutwara 50% by’umubare zemerewe gutwara, kandi hakubahirizwa amabwiriza yo kwirinda Covid-19.
Insengero zahawe uburenganzira bwo gukora kuko zujuje ibisabwa mu kwirinda Covid-19, zemerewe kwakira 50% by’ubushobozi bwazo bwo kwakira abantu, inshuro imwe mu cyumweru.
Imihango yo gushyingura ntigomba kurenza abantu 50.
Umubare w’abitabira ikiriyo ntugomba kurenga 15 icya rimwe.
Imyitozo ngororamubiri ikorerwa mu nyubako z’imyidagaduro no kogera muri pisine birabujijwe. Icyakora abantu bacumbitse muri hoteli bemerewe gukora izo siporo zombi kuri hoteli bacumbitsemo, ariko berekanyue ko bipimishije Covid-19.
Imikino ya Shampiyona y’Igihugu y’umupira w’amaguru hamwe n’imyitozo y’abakinnyi byahagaritswe gusa amakipe y’umupira w’amaguru ari mu marushanwa mpuzamahanga yo yemerewe gukomeza kubyitabira.
Musanze yashyiriweho umwihariko
Umujyi wa Musanze, ifoto: Imvaho Nshya
Bitewe n’umubare ukabije w’abandura Covid-19 ukomeje kugaragara muri aka karere k’ubukerarugendo, Inama y’Abaminisitiri yagashyiriyeho ingamba zihariye.
Guhera kuri uyu wa 15 Ukuboza 2020, muri Musanze ingendo zirabujijwe guhera saa moya z’umugoroba kugeza saa kumi z’igitondo.
Muri Musanze, inama zirabujijwe mu gihe cy’ibyumweru bitatu uhereye uyu munsi.
Insengero zasabwe uburenganzira bwo gukora kuko zujuje ibisabwa mu kwirinda Covid-19, zemerewe kwakira 30% by’ubushobozi bwazo bwo kwakira abantu inshuro imwe mu cyumweru.
Muri uyu mujyi kandi, imihango yo gushyingura ntigomba kurenza abantu 30.
