Igisirikare cya Uganda, UPDF, gifatanyije n’igisirikare cy’u Bufaransa byasoje imyitozo yo kurwanira mu misozi byari bimazemo iminsi irindwi . Muri iyi myitozo abasirikare bagombaga kuzamuka Umusozi wa Rwenzori bakagera ku gasongero kawo.
Bimwe mu bikorwa byibanzweho muri iyi myitozo harimo ijyanye n’ubutabazi bw’ibanze, kwita ku bikoresho biturika gitunguranye (Improvised Explosive Devises), imirwanire no gukora ibikorwa by’ubutabazi mu misozi.
Ubwo yahaga ikaze abasirikare bari bavuye mu misozi mu Ishuri ry’imyitozo y’intambara zo mu misozi (MWTS) i Karugutu, uwungirije komanda wa division y’ingabo zirwanira mu misozi, Col. Chris Ogwal, yashimiye abasirikare basoje imyitozo.
Yavuze ko UPDF yubatse ubushobozi mu bijyanye n’imirwanire yo mu misozi mu rwego rwo kwitegura ibitero byagabwa kuri uyu Uganda bivuye mu misozi ya Rwenzori, Elgon na Kigezi.
Nk’uko iyi nkuru dukesha Chimpreports ikomeza ivuga, Col Ogwal yashimiye Guverinoma y’u Bufaransa ku mikoranire myiza bafitanye, yongeraho ko Abafaransa bahawe ikaze buri gihe mu yindi myitozo nk’iyi.
Umukozi wa Ambasade y’u Bufaransa ushinzwe ubwirinzi (Defence Attache), Lt Col. Bertrand De Boise, yashimiye ubuyobozi bwa UPDF ku bufasha bwatanze muri iyi myitozo.
Igisirikare cy’u Bufaransa kimaze imyaka ine gitoza icya Uganda kurwanira mu misozi, kuko ibi bikorwa byatangiye kuvugwa kuva mu 2016, buri mwaka bikaba bikomeza.
Muri Gicurasi umwaka ushize, imyitozo nk’iyi nabwo yabereye mu Karere ka Ntoroko , mu gikorwa cyiswe “Mountain Ghost” cyamaze iminsi 10.
