Ikipe y’igihugu ‘Amavubi’ mu rwego rwo kwitegura irushanwa rya CHAN 2021 rihuza abakinnyi bakina mu bihugu byabo, yateguye irushanwa rito rizakinwa n’amakipe y’ibihugu atatu, arimo Congo Brazzaville na Namibia.
Nkuko bigaragara ku rubuga rwa Ferwafa, ni irushanwa riteganyijwe kuzakinwa tariki ya 07-11 Mutarama 2021 rikazakinirwa i Kigali.
Ni irushanwa rito (Pre-CHAN mini Tournament), rizafasha aya makipe yose y’ibihugu uko ari atatu kwitegura neza mbere yo kwerekeza muri Cameroun muri CHAN.
Biteganyijwe ko, Amavubi azatangira CHAN ahura na Uganda Cranes tariki ya 18 Mutarama 2021, bakazakurikizaho Maroc tariki ya 22 Mutarama 2021 hanyuma bazasoreze kuri Togo tariki ya 26 Mutarama 2021, ubundi imikino y’amatsinda ibe irangiye.
Uko amatsinda yo muri CHAN 2021 ameze:
1. Itsinda rya mbere (A): Cameroun, Mali, Burkina Faso, Zimbabwe
2. Itsinda rya kabiri (B): Libya, DR Congo, Congo Brazzaville, Niger
3. Itsinda rya gatatu (C): Rwanda, Uganda, Maroc, Togo
4. Itsinda rya kane (D): Zambia, Guinea, Namibia, Tanzania
Buri tsinda rikazavamo amakipe abiri azamuka muri ¼ cy’irangiza.
U Rwanda, ni ku nshuro ya kane rugiye kwitabira amarushanwa ya CHAN kuva muri 2011, 2016, 2018 n’uyu mwaka wa 2020.
