Myugariro Sergio Ramos yamaze kubwira Ikipe ya Real Madrid ko adashobora kongera amasezerano, nyuma yo kutumvikana n’ubuyobozi ku bijyanye n’igihe cy’amasezerano ye mashya.
Umutoza Zinedine Zidane yifuje ko Ramos, Luka Modric na Lucas Vasquez bakongererwa amasezerano, gusa ibya Ramos na Vasquez bikomeje kudasobanuka.
Ikinyamakuru Marca gisobanura ko Real Madrid na Ramos bari gupfa ibijyanye n’igihe cy’amasezerano agomba gusinya.
Kiriya gitangazanakuru cyandikirwa i Madrid kivuga ko Real Madrid ishaka ko Ramos yahabwa umwaka umwe w’amasezerano ndetse umushahara we ukava kuri miliyoni 12 ukagera kuri miliyoni 10 z’ama-Euro ku mwaka; ibintu uriya mukinnyi adakozwa.
Impamvu Real Madrid idashaka kurengereza Sergio Ramos umwaka umwe w’amasezerano iri muri politiki iriya kipe isanzwe ikoresha ku bakinnyi bari hejuru y’imyaka 30 y’amavuko, hakiyongeraho ingaruka icyorezo cya COVID-19 cyagize ku bukungu bw’Isi.
Amakuru avuga ko ibya Real Madrid na Kapiteni wayo bikomeje gucungirwa hafi n’amakipe arimo Manchester City, ku buryo bikomeje kuzamba yahita yegukana uriya mukinnyi.
