Nyuma y’igihe gito ibihugu bitandukanye bitangiye gukingira abaturage babyo icyorezo cya COVID-19, igihugu cya Seychelles ku cyumweru cyatangiye gutanga inkingo ku baturage bacyo, kiba icya mbere muri Afurika kibigezeho.
Minisitiri w’Ubuzima muri kiriya gihugu, Peggy Vidot, ni we wari watangaje ko igikorwa cyo gutanga inkingo gitangira ku cyumweru, hanyuma ku ikubitiro hagatangira gukingirwa abayobozi bakuru b’igihugu.
Perezida wa Seychelles, Wavel Ramkalawan, ari mu bakingiwe COVID-19 bwa mbere nk’uko inkuru dukesha Africa News ibivuga.
Seychelles iri gukingira abaturage bayo COVID-19 yifashishije urukingo rwakozwe n’igihugu cy’Ubushinwa rwakozwe na laboratwari ya Sinopharm.
Iki gihugu kigizwe n’ibirwa biherereye mu nyanja y’Abahinde kikanaba igito kurusha ibindi muri Afurika, cyaherukaga guhabwa doze z’inkingo 50,000 na leta zunze ubumwe z’Abarabu, nk’impano yo kugifasha gukingira abaturage bacyo COVID-19.
Seychelles irateganya gukingira abaturage bayo bose kiriya cyorezo ariko bigakorerwa ababyifuza.
Imibare yerekana ko kuva icyorezo cya COVID-19 cyagera mu birwa bya Seychelles, ababarirwa muri 420 bacyanduye, mu gihe umuntu umwe yishwe na cyo; ariko hari impungenge z’uko imibare y’ubwandu ishobora kwiyongera kubera ko imibare y’ubwandu isigaye ihagaze ku bantu 20 ku munsi.
Biteganyijwe ko kuri uyu wa Mbere Seychelles ikingira abakora mu nzego z’ubuzima, hagakurikiraho abakozi bo mu zindi nzego z’igihugu ndetse n’abaturage bafite ku myaka 65 kuzamura.
Buri munsi hazajya hakingirwa abarenga 1000.
