Munyakazi Sadate wahoze ayobora Ikipe ya Rayon Sports, yemereye agahimbazamusyi kangana na $100 buri mukinnyi w’Amavubi, mu gihe iyi kipe yaba ishoboye gukura amanota atatu ku Misambi ya Uganda.
Sadate yemeje intego yahaye abasore b’Amavubi mu butumwa yanditse ku rubuga rwe rwa Twitter.
Ati: “Nta kinini navuga ku basore bacu, gusa uko bizagenda kose turabashyigikiye kuko ndabizi muzitanga bihagije, icyo mbisabiye ku mpamvu zanjye bwite nti muzanteze UMUGANDE rwose muzamutsinde ndetse ni intego ndayemeye rwose 100$ kuri buri muntu uri muri Cameroun iyo ntsinzi niboneka.”
Mu gitondo cyo kuri uyu wa Gatatu ni bwo Amavubi yahagurutse i Kigali yerekeza irushanwa rya CHAN rizahabera guhera ku wa Gatandatu w’iki cyumweru.
Ikipe y’igihugu yamaze kugera mu gihugu cya Cameroon igizwe n’abakinnyi 30 ndetse n’abatoza bagomba kurya kw’arenga $3,000 Sadate azatanga mu gihe Amavubi yaba akuye amanota atatu kuri Uganda.
Amavubi na Uganda bazahura ku wa Mbere Tariki ya 18 Mutarama, mu mukino uzabera kuri Stade de la RĂ©unification i Douala.
