Umushumba wa Kiliziya Gatolika muri Kinshasa, Karidinali Fridolin Ambongo yahishuye ko Perezida wa Repubulika ya Demukarasi ya Congo, Félix Tshisekedi ajya guha imbabazi abahamwe ibyaha byo kwica Laurent Désiré Kabila, yabanje kubyumvikanaho n’umuryango we.
Byumvikanye kuri uyu wa 16 Mutarama 2021, ubwo Abanyekongo bibukaga ku nshuro ya 20 urupfu rwa L.D Kabila wabaye Perezidda wa gatatu wa RDC, akaba ari se wa Joseph Kabila, wamusimbuye ku mwanya w’Umukuru w’Igihugu.
L.D Kabila amaze imyaka 20 yishwe
Karidinali Ambongo yashimiye Perezida Tshisekedi wababariye abahamwe n’iki cyaha barimo Col. Eddy Kapend. Ati: “Dufashe uyu mwanya kugira ngo dushimire Umukuru w’Igihugu Félix Antoine Tshisekedi wafashe icyemezo cyo kubaha imbabazi, abyumvikanyeho n’umuryango wa nyakwigendera.”
Umushumba wa Kiliziya muri Kinshasa, Karidinali Ambongo
LD Kabila yishwe n’umurinzi we tariki ya 16 Mutarama 2001, hakurikiraho itabwa muri yombi ry’abantu benshi bakoranaga bya hafi, barimo Col. Kapend wahageze amaze kuraswa.
Abenshi mu batawe muri yombi, bahawe imbabazi na Perezida Tshisekedi guhera mu 2020 hagati, Col. Kapend wari ku ruhembe rw’abahamwe n’uruhare rukomeye mu rupfu rw’uyu munyapolitiki, we yahawe imbabazi mu ntangiriro z’uku kwezi 2021, hamwe n’abandi bari bakurikiranweho dosiye imwe.
