Urupfu rw’umusirikare wa RDF muri Centrafrica n’intsinzi ya Museveni mu nkuru zaranze icyumweru gishize

Ku bijyanye n’icyorezo cya Covid-19, kuva tariki ya 11 kugeza ku ya 17 Mutarama 2021, handuye abantu 1402, hapfa 22, mu gihe abakize ari 389.

Izindi nkuru zaranze icyumweru gishize:

Umusirikare w’u Rwanda yiciwe muri Centrafrica

Umuvugizi w’Intumwa Yihariye y’Umunyamabanga Mukuru w’Umuryango w’Abibumbye, Vladimir Monteiro, tariki ya 13 Mutarama 2021 yatangaje ko umusirikare w’u Rwanda wari mu butumwa bw’amahoro yiciwe muri Centrafrica.

Ni mu gitero ihuriro ry’imitwe yitwaje intwaro irwanya ubutegetsi bwa Centrafrica, CPC ryari ryagabye mu nkengero z’umurwa mukuru, Bangui, zishaka kuwinjiramo, zikaza gukomwa mu nkokora n’ingabo za UN ziri mu butumwa bw’amahoro muri iki gihugu (MINUSCA) ku bufatanye n’ingabo z’iki gihugu.

Mu mirwano yabayeho kandi, abarwanyi ba 37 CPC barapfuye, abandi 5 bafatwa mpiri.

Miliyoni 280 zaburiwe irengero mu mezi 9 y’umwaka w’2020

Banki Nkuru y’Igihugu, yatangaje ko miliyoni 280 z’amafaranga y’u Rwanda zaburiwe irengero kuva muri Mutarama kugeza muri Nzeri 2020.

Yatangaje ko aya mafaranga yose yatikiriye mu byaha by’itekamutwe 141 byakozwe, byiganjemo iby’ifashishije ikoranabuhanga birimo koherereza abantu za ‘emails’, guhamagara no koherereza abantu ubutumwa mu buryo bw’ubutekamutwe.

Museveni yatsindiye manda ya 6

Komisiyo ya Uganda ishinzwe amatora, kuri uyu wa 16 Mutarama 2021 yatangaje ko Perezida Yoweri Museveni yegukanye manda ya 6 nyuma y’amatora yabaye tariki ya 14 Mutarama.

Uyu musaza w’imyaka 75 y’amavuko, yagize amajwi 58.64% mu gihe Robert Kyagulanyi (Bobi Wine) wamukurikiye, yagize 34.83% , Patrick Amuriat agira 3%, abandi 8 bagira ibice.

Perezida Museveni wagiye ku butegetsi mu 1986, agiye kuyobora Uganda indi myaka itanu.

Urubanza rw’umurage rwatumye umurambo wa Mirimo utaburwa

Ababishinzwe kuri uyu 15 Mutarama 2020 bataburuye umurambo wa Mirimo Gaspard washyinguwe mu 2016, nyuma y’aho Urukiko rw’Ibanze rwa Nyarugenge rutegetse ko utaburwa mu irimbi rya Rusororo kugira ngo ufatwe ibipimo ndangasano (DNA Test).

Byatewe n’abana babiri barimo uw’imyaka 30 n’undi w’8 bavuga ko babyawe na Mirimo ndetse banabifitiye ibimenyetso, bakabiheraho basaba umunani mu mutungo uyu munyemari yasize.

Ni mu gihe umugore wa Mirimo, Muhongayire Winifride we avuga ko atazi aba bana, bityo atari ab’umugabo we, badakwiye kubaza umunani.