Umuyobozi w’ikipe ya Gasogi United, Kakooza Nkuliza Charles (KNC), yemereye ishimwe ringanga na $100 buri mukinnyi n’abagize staff y’ikipe y’Igihugu ‘Amavubi’, mu gihe baba batsinze umukino wa CHAN bazahuriramo na Maroc.
KNC yiyemeje uriya muhigo kuri uyu wa Gatatu, mu kiganiro Rirarashe gitambuka kuri TV na Radio1.
Yagize ati “Gutsinda Maroc buri mukinnyi ni idolari 100. Na Staff tekinike [abatoza, abaganga n’ababafasha] na bo mbashyizemo.”
Itsinda ry’Amavubi ryagiye muri CHAN 2020 muri Maroc rigera ku bantu 54 barimo abakinnyi 30 n’abandi bagera kuri 17 barimo abatoza n’ababafasha.
Bivuze ko mu gihe u Rwanda rwatsinda Maroc muri uyu mukino, KNC azatanga agera ku 4700$ (asaga miliyoni 4.6 Frw) ku bagize ikipe y’Igihugu.
KNC Si we wa mbere wemereye Amavubi agahimbazamusyi muri iri rushanwa dore ko Munyakazi Sadate wayoboye Rayon Sports, na we yari yemeye gutanga 100$ iyo u Rwanda rutsinda Uganda banganyije 0-0.
Uwabaye kapiteni w’Amavubi, Mbonabucya Désiré, yemereye Amavubi miliyoni 5 Frw mu gihe yagera muri ¼ cya CHAN 2020. Minisitiri wa Siporo, Munyangaju Aurore Mimosa, na we yasezeranyije abakinnyi ko nibitwara neza bazashimirwa.
Amavubi azahura na Maroc mu mukino wa Kabiri wo mu tsinda C uteganyijwe kuba ku wa Gatanu guhera saa kumi n’ebyiri z’umugoroba.
Ubwo u Rwanda ruheruka guhura na Maroc muri CHAN hari mu irushanwa rya 2016 rwari rwakiriye, ariko aba barabu batsinda ibitego 4-1 nubwo Amavubi yari yaramaze kwizera itike ya ÂĽ.
