Urugereko rwihariye rw’urukiko rukuru ruburanisha ibyaha mpuzamahanga n’ibyambukiranya imipaka ruri mu Karere ka Nyanza, rwasubitse urubanza rwa Paul Rusesabagina na bagenzi be, ruvuga ko ruzabera i Kigali tariki 17 Gashyantare 2021.
Kuri uyu wa Kabiri ni bwo Rusesabagina na bagenzi be 19 bahoze ari abarwanyi b’umutwe wa MRCD-FLN yashinze bari kugezwa imbere y’urukiko, bakaburanishwa ku byaha bitandukanye bakurikiranweho.
Ni nyuma y’uko ku wa 03 Ukuboza Urukiko rwari rwanzuye ko dosiye ya Nsabimana Callixte wiyise Sankara wari Umuvugizi w’Umutwe wa FLN n’iya Nsengimana Herman wamusimbuye kuri uwo mwanya, ihuzwa n’iya Paul Rusesabagina n’abandi bantu 17, kuko rwasanze ibyaha baregwa birimo iterabwoba, ubwicanyi, gushimuta no gutwikira abantu babihuriyeho.
Urukiko rwavugaga ko rwasuzumye icyifuzo cy’ubushinjacyaha buhuriyeho na bamwe mu baregwa barimo Nsabimana na Nsengimana rusanga gifite ishingiro.
Mu iburanisha ryari ryabanje ubushinjacyaha bwari bwasabye ko dosiye ya Nsabimana na Nsengimana ihuzwa n’iya Rusesabagina Paul na bagenzi be 17, kuko ibyaha baregwa bifitanye isano ku kigero cyo hejuru.
Bwavuze ko bose bakurikiranyweho ibyaha bijyanye n’umutwe wa MRCD-FLN, bityo mu buryo bw’imigendekere myiza y’urubanza, ari byiza ko izo dosiye ziburanishirizwa hamwe kuko mu byo baregwa hari byinshi bahuriyeho.
Nsabimana Callixte nawe yavuze ko byaba byiza dosiye yabo ihujwe n’iya Rusesabagina Paul nk’uko yabyifuje mu maburanisha yabanje, ariko avuga ko afite ikibazo kuri abo barwanyi bandi kuko bose atabazi.
Ati: “Rusesabagina turi kumwe mu rukiko tukavuga uko ibintu byagenze byaba byiza kuko abantu bagiye bagira ngo ni njyewe muyobozi wa FLN kandi atari njye, guhuza dosiye rero ni byiza.”
Mu gihe iburanisha ryagombaga kuba uyu munsi, Urukiko rwahisemo gusubika ruriya rubanza rurwimurira mu mujyi wa Kigali.
Ni umwanzuro wafashwe nyuma y’ubusabe bw’abaregwa, ubushinjacyaha, abunganizi mu mategeko ndetse n’abaregera indishyi, bifuzaga ko abaregwa bose baburana imbonankubone hatifashishijwe ikoranabuhanga.
Urukiko rwavuze ko bitewe n’ubuto bw’icyumba cy’iburanisha cy’i Nyanza, bitakoroha ko bose babateranyirizamo kandi basabwa kubahiriza amabwiriza yo kwirinda COVID-19, rutegeka ko urubanza ruzaburanishirizwa mu cyumba cy’Urukiko rw’Ikirenga ku Kimihurura.
