Kamonyi: Gitifu w’Akagari ashinjwa guhohotera abatera akabariro

Amakuru dukesha TV1 avuga ko uyu muyobozi uwo aketseho ikosa, adatinya kumusanga mu buriri, akamwirukankana yambaye ubusa.

Umugore ushinja Gitifu Mbonyebwayo kumusanga mu buriri ari gutera akabariro n’umugabo we saa kumi n’imwe z’igitondo, yagize ati: “Yadusanze mu buriri aje kudufatiramo, barinjira barakingura rwose, baraza badusanga mu buriri, baradukubitagura n’umugabo. Twari twitangiriye n’umurimo w’abashakanye, ni uko rero birangira badukubise.”

Akomeza ati: “Ankubita ingumi mu musaya, ubwo nari ndimo nkurura Gitifu ngo ave hejuru y’umwana kuko yari yacecetse mvuga nti ‘wenda yapfuye’, ankubita n’indi y’agatuza…”

Iby’uku gusagararira no guhohotera abashakanye, bihamywa n’umuturanyi w’uyu muryango, wagiye gutabara azi ngo ni umugore n’umugabo barimo kurwana. Ati: “Nagiye kumva numva saa 5h30 umwana avugije induru, noneho njyewe ndabyuka, ubwo nari nzi ko ari umugabo n’umugore barimo kurwana. Bamusohokanye barimo kumunigagura, yari yambaye amabere hejuru…”

Si ubuhamya bw’uyu muryango n’uyu muturanyi gusa bushinja Gitifu Mbonyubwayo guhohotera abambaye ubusa, kuko no kuri uyu wa 25 Mutarama 2021 hari undi mugabo ngo yakubise abwambaye, byose akaba abikora yitwaje amapingu.

Abaturage barasabira Gitifu Mbonyubwayo kweguzwa, akanajyanwa mu kigo ngororamucyo, ku bwo kwandagariza bagenzi babo ku karubanda, cyane cyane abashakanye.

Iki gitangazamakuru cyashatse kumenya icyo we abivugaho, kimuhamagara ku murongo wa telefone, ntiyayifata. Cyavuganye n’Umuyobozi w’Akarere ka Kamonyi w’agateganyo, Thaddée Tuyizere, avuga ko agiye gukurikirana iki kibazo, ati: “Turabikurikirana. Sindakurikirana scene neza uko yakurikiranye kandi dufite inzego dukorana zifite ubushobozi bwo gukurikirana buri kintu cyose. Ubwo rero numva turi bubijyanemo tugakurikirana…”

Meya Tuyizere yavuze ko nibasanga Gitifu Mbonyubwayo yarakoze amakosa ajyanye n’akazi, azabihanirwa, nibigaragara ko yanavogereye uburenganzira bw’undi, nabwo azakurikiranwa n’inzego zibishinzwe.