Icyumweru gishize cyatangiye tariki ya 25 Mutarama 2021 kikaba kinasoje ukwezi kwa Mutarama, cyaranzwe n’amakuru y’ingenzi arimo: imikino, politiki, ubuzima n’ubutabera; hafi ya yose yerekeye ingamba zo kwirinda icyorezo cya Covid-19; haba mu Rwanda no mu mahanga.
Twegeranyije akurikira:
U Bwongereza burikanga ubwandu bushya bwa Covid-19 mu Rwanda
Guverinoma y’u Bwongereza tariki ya 28 Mutarama 2021 yafashe icyemezo cyo gukumira abagenzi baturuka mu Rwanda bitewe n’uko ifite impungenge ko ubwandu bushya bw’icyorezo cya Coronavirus bwabonetse muri Afurika y’Epfo bwagera no muri iki gihugu.
Nk’uko byagaragaye mu itangazo ry’iyi Guverinoma iyobowe na Minisitiri w’Intebe Boris Johnson, aba bagenzi bakumiriwe mu gihe cy’ibyumweru bibiri, guhera tariki ya 29 Mutarama 2021, saa saba z’amanywa.
Iki gihugu cyakumiriye aba bagenzi hamwe n’abandi baturuka mu Burundi ndetse no muri Leta Zunze Ubumwe z’Abarabu (UAE); bose ku bw’izi mpungenge.
Intsinzi y’Amavubi yibagije abaturage ko Covid-19 iriho
Tariki ya 26 Mutarama 2021, ikipe y’igihugu y’umupira w’amaguru (Amavubi), yazereye iya Togo mu irushanwa rya CHAN iyitsinze ibitego 3-2, yo ikatisha itike yo gukomereza muri ¼ .
Bitewe n’uko abenshi bari basa n’abadafite icyizere ko iyi kipe yatsinda Togo, ibyishimo byarabasaze, abari mu mujyi wa Kigali basanzwe bari muri Gahunda ya Guma mu Rugo, birara mu mihanda mu masaa tanu y’ijoro babyina intsinzi.
Ku munsi wakurikiyeho, inzego zirimo Polisi y’Igihugu zagaye imyitwarire y’aba bafana, bitewe n’uko bishe amabwiriza yo gukumira icyorezo cya Covid-19, bishyira mu kaga ko kwandura.
Polisi na Minisiteri ya Siporo, basobanuriye Abaturarwanda uburyo kwishimira intsinzi ari byiza, ariko banarinda ubuzima bwabo. Basabye ko imyitwirire y’abafana nk’iyi itasubira mu gihe Amavubi yakongera gutsinda.
Gusa Amavubi ntiyahiriwe ku mukino wayahuje na Guinea wagombaga gutuma akomereza mu cyiciro cya ½ cy’irushanwa, kuko yasezerewe atsinzwe igitego 1-0.
Umugororwa yatorotse gereza ya Muhanga
Urwego rw’Igihugu rushinzwe imfungwa n’abagororwa (RCS) rwatangaje ko ruri gushakisha umugororwa witwa Mfitumukiza Jovin watorotse gereza ya Muhanga yari afungiwemo mu ijoro rya tariki ya 27 Mutarama 2021.
Amakuru avuga muri iryo joro ubwo uyu mugororwa yatorokaga, abacungagereza bagerageje kurasa ariko birangira abacitse.
Nk’uko byatangajwe, Mfitumukiza yari afungiwe kugira uruhare mu iyicwa ry’umumotari witwa Samson Ndirabika, ryabaye muri Nyakanga 2020 mu Murenge wa Shyogwe w’Akarere ka Muhanga.
RCS irasaba ko uwabona Mfitumukiza, yamutangaho amakuru, maze agafatwa.
Magufuli yanze urukingo rwa Covid-19
Perezida wa Repubulika ya Tanzania, John Pombe Magufuli yasabye Minisitiri w’Ubuzima kwitondera kwakira urukingo rwa Covid-19, kuko ngo rwaba ari rubi ku bantu bazaruterwa.
Uyu Mukuru w’Igihugu wakunze kugaragaza imyumvire itandukanye ku cyorezo cya Covid-19, yibajije ku mpamvu cyaba kibonewe urukingo nyuma y’igihe gito kigaragaye ku Isi, mu gihe ibyorezo nka SIDA, Igituntu n’izindi ndwara zakunze kwibasira umugabane wa Afurika batarazibonera inkingo n’imiti kandi bimaze igihe kinini.
Magufuli yagaragaje ko abashishikariza abandi gufata inkingo hari ikindi bashobora kuba bagamije, asaba ko Tanzania yakwemera kuzikoresha ari uko abahanga bayo babanje kuzikorera isuzuma.
