Ikipe ya Simba Sports Club yo mu gihugu cya Tanzania, yatangiye neza imikino y’amatsinda ya CAF Champions league ijya gutsindira AS Vita Club i Kinshasa igitego 1-0.
Hari mu mukino ufungura itsinda A wabereye kuri Stade des Martyrs i Kinshasa aya makipe yombi ahuriyemo na Al Ahly yo mu Misiri na Al-Mirreck yo muri Sudani.
Rutahizamu Meddie Kagere w’ikipe y’igihugu ‘Amavubi’, yabanje ku ntebe y’abasimbura muri uriya mukino, mbere yo kwinjira mu kibuga ku munota wa 76 asimbuye Umukongomani, Chrispain Mugalu.
AS Vita Club yihariye igice cya mbere cy’umukino, gusa inanirwa kumena urukuta rwa Simba Sports Club ibyanatumye amakipe yombi ajya kuruhuka anganya 0-0.
Simba Sports Club y’umutoza Didier Gomes da Rosa, yafunguye amazamu ku munota wa 60 w’umukino ibifashijwemo na Penaliti ya Chrispain Mugalu, nyuma y’uko myugariro Ousamane Wattara ukomoka muri CĂ´te d’Ivoire yari amaze gukora umupira mu rubuga rw’amahina.
AS Vita Club yakoze impinduka zirimo iya Ricky Tulenge, Jesus Moloko na Zemanga Soze binjiye basimbura Glody Lilepo, Sidi Yacoub na Jérémie Mbuyi zitigeze zigira icyo ziyimarira.
Uburyo bukomeye iyi kipe yabonye bwaje ku munota wa 76 ubwo Tulenge yarekuraga ishoti rikomeye ryakuwemo n’umuzamu Aishi Manula.
Gutsinda Vita Club byatumye Simba ihita iyobora itsinda A n’amanota atatu, mu gihe ikipe ziyikurikiye zifite ubusa.
Iyi kipe mu mukino w’umunsi wa kabiri w’itsinda igomba kwakira Al Ahly y’umutoza Pitso Mosimane iheruka kwegukana umwanya wa gatatu mu gikombe cy’Isi cy’ama-Clubs cyaberaga muri Qatar.
