Umunya-Politiki utavuga rumwe n’ubutegetsi bwa Uganda, Robert Ssentamu Kyagulanyi uzwi nka Bobi Wine, yateje impaka mu bakoresha Twitter nyuma yo gutangaza ko yaganiriye na Juan Guaido yise Perezida wa Venezuela.
Ku wa Gatatu Bobi Wine yavuze ko yishimiye “Kuvugana na Perezida Juan Guaido wa Venezuela kuri uyu mugoroba.”
Uyu muhanzi wahindutse umunyapolitiki yavuze ko we na Guaidó baganiriye “ku rugendo rw’ibihugu byombi [Uganda & Venezuela] ndetse n’ibikenewe mu kubaka ubufatanye mu kurengera amahame ya demokarasi n’uburenganzira bwa muntu ku Isi.”
Ni amagambo yakuruye impaka ndende mu bakurikira Bobi Wine kuri Twitter, bamwe bamubwira ko Guaido atari Perezida wa Venezuela [kuko Perezida ari Nicolas Maduro], abandi bati: “Guaido ni we Perezida kuko yemejwe n’ibihugu 60 birimo Leta zunze Ubumwe za Amerika n’Umuryango w’Ubumwe bw’Uburayi.”
Uwitwa Uncle Assurance n’abandi benshi bagaragaje ko “Perezida wa Venezuela ni Nicolás Maduro Moros.”
Uwitwa Charles Emeritus we yavuze ko “Guaido si Perezida wa Venezuela watowe kandi urabizi! Abaturage batoye ku bwinshi Maduro batitaye ku kuba Amerika yaragerageje guhirika kenshi ubutegetsi bwa Chavez na Maduro.”
Uwitwa Joka we yibukije ko aheruka “kuva muri Mutarama 2021, Guaidó yananiwe guhagurutsa Maduro ku butegetsi. Ubutegetsi bwa Maduro bwangiye Guaidó kuva mu gihugu, bufatira imitungo afite muri Venezuela, bumutangizaho iperereza bumushinja gukorana n’amahanga hanyuma akangisha guteza imvururu.”
Bamwe mu bakurikira Bobi Wine banamushinje kuba igikoresho cy’ibihugu byo mu Burengerazuba bw’Isi nka Guaidó, bashimangira ko nta rukundo afitiye Abanyafurika.
Mu by’ukuri ni nde Perezida wa Venezuela?
Nicolas Maduro ni Perezida wa Venezuela kuva muri 2013, nyuma yo kugera ku butegetsi asimbuye Hugo Chávez wayoboye kiriya gihugu kuva mu 1999.
Mu ntangiriro za 2019 ni bwo Maduro yarahiriye kuyobora Venezuela muri manda ya kabiri, nyuma y’amatora yamaganwe n’abatavuga rumwe n’ubutegetsi akanarangwa n’ibirego byuko yaba yarabayemo uburiganya.
Ni amatora yabaye intandaro y’imyigaragambyo ikomeye yo kwamagana Maduro, biramgira Juan Guaidó yitangaje nk’uwatsinze.
Icyo gihe Ibihugu birimo Leta Zunze Ubumwe z’Amerika n’iby’Umuryango w’Ubumwe bw’Uburayi byatangaje ko bishyigikiye Guaidó nka perezida wa Venezuela, gusa abarimo Uburusiya batangaza ko bashyigikiye Maduro.
Muri Mutarama uyu mwaka Leta zunze ubumwe za Amerika n’Umuryango w’Ubumwe bw’Uburayi, batangaje ko batagishyigikiye Guaidó nka Perezida w’agateganyo wa Venezuela, nyuma yo gutsindwa amatora nka Perezida w’Inteko Ishinga amategeko.
Ni ibisobanuye ko Nicolas Maduro ari we Perezida wa Venezuela.
