Ku wa Kabiri Tariki ya 09 Werurwe, mu murenge wa Nyakiliba mu karere ka Rubavu habereye igikorwa cyo kwangiza ibiyobyabwenge bifite agaciro k’abarirwa muri Frw miliyoni 200.
Ibiyobyabwenge byangijwe bingana n’ibiro 1,800; birimo urumogi rungana n’ibiro 1,550 n’inzoga ziganjemo Kanyanga.
Umuyobozi w’akarere ka Rubavu, Habyarimana Gilbert, yavuze ko biriya biyobyabwenge byangijwe ari ibyagiye bifatwa mu bihe bitandukanye mu myaka ibiri ishize.
Meya wa Rubavu yavuze ko iyo ibi biyobyabwenge bidafatwa byari guteza ibibazo bitandukanye mu baturage, birimo ubwiyongere bw’ibyaha.
Yagize ati: “Ibi biyobyabwenge ibiro 1,800 mubonye iyo bigera mu baturage, namwe murumva ababa barangiritse.”
“Ibi ingaruka zabyo ni nyinshi, kuko navuga ko ari intandaro y’ibindi byaha byinshi, yaba ibijyanye no gukubita no gukomeretsa, yaba ari ugusambanya abana, yaba ari ukwiba; mu biyobyabwenge tubonamo ingaruka z’ibindi byaha nyinshi ku buryo ikilo kimwe iyo gitambutse tuba tuzi ko hazangirika byinshi.”
Meya Habyarimana yahamagariye abanya-Rubavu guhaguruka bagafasha ubuyobozi guhangana n’abacyumva ko bashobora guca mu rihumye bagakora ubucuruzi bw’ibiyobyabwenge.
Urubyiruko rwari aho biriya biyobyabwenge rwo rwavuze ko nta wukwiye gukomeza kureberera abinjiza ibiyobyabwenge ku butaka bw’u Rwanda, kuko bigira ingaruka mbi ku mibereho ndetse no ku bukungu bw’abaturage.
Biriya biyobyabwenge byangijwe mu gihe mu karere ka Rubavu hari abantu batandatu baherutse gufatirwa na Polisi y’u Rwanda mu mirenge ya Gisenyi na Rubavu, bakekwaho gukwirakwiza urumogi mu baturage.
Bose uko ari batandatu bafatanwe udupfunyika 2,610 twurumogi.
Ni mu gihe mu Rwanda, amategeko ahana ibyaha birimo gucuruza ibiyobyabwenge, kubihinga, kubitunda no kubikwirakwiza bihanishwa igifungo gishobora kugera ku gufungwa burundu.
Kurikira ibiganiro n’amavidewo binyura kuri Bwiza TV
