Minisiteri y’Ubuzima mu Rwanda ivuga ko kuva gahunda yo gukingira icyorezo cya Covid-19 yatangira tariki ya 5 kugeza ku ya 13 Werurwe 2021, hamaze gukingirwa Abaturarwanda barenga 254,000.
Ni gahunda yatangiye nyuma y’iminsi ibiri inkingo za mbere za Covid-19 zibarirwa mu 342,000; zirimo 240,000 za AstraZeneca n’102,000 za Pfizer BioNTech zigeze mu Rwanda.
Uko igikorwa cyagenze kuva ku munsi wa mbere
Ku munsi wa mbere w’iyi gahunda hakingiwe abantu 75,056 barimo: abakozi bo mu bigo by’ubuvuzi (abaganga n’abandi), abakangurambaga b’ubuzima n’abarusha abandi ibyago bwo kwakura cyangwa kuzahazwa na Covid-19.
Ku munsi wa kabiri (tariki ya 6) hakingiwe abantu 83,842 barimo: abarimu bafite ibyago byo kwandura no kuzahazwa n’iki cyorezo kurusha abandi, abajyanama b’ubuzima ndetse n’abafite imyaka 65 y’amavuko kuzamura.
Ku munsi wa gatatu (tariki ya 7) hakingiwe abantu 37,503 barimo itsinda rishinzwe gukurikiranira hafi, kurwanya no gukumira Covid-19 mu Rwanda, abafite imyaka 65 n’abayirengeje, abajyanama b’ubuzima n’abarimu.
Ku munsi wa kane (tariki ya 8), hakingiwe abarenga 10,000 barimo: abarwaye indwara zidakira, abamugaye, abakozi bo kibuga cy’indege mpuzamahanga cya Kigali (i Kanombe), abacuruzi n’abatwara taxi.
Ku munsi wakurikiyeho (tariki ya 9) hakingiwe abarenga 11,000 barimo imfungwa n’abagororwa muri Gereza ya Mageragere babarirwa mu 2300, abamotari, abanyonzi, DASSO n’abakozi ba Leta barusha abandi ibyago byo kwandura Covid-19.
Ku munsi wa 6 (tariki ya 10) hakingiwe abagera mu 9000 barimo impunzi zaturutse muri Libya ziba mu nkambi y’agateganyo ya Gashora n’abakozi baho, ndetse n’abari mu zabukuru.
Ku munsi wakurikiyeho (tariki ya 11) hakingiwe abagera ku 10,000 barimo abamotari, abakozi b’amahoteli azakira inama y’Abakuru b’Ibihugu bigize umuryango Commonwealth (CHOGM), abakozi bo mu bigo by’ubuvuzi byigenga n’abari mu zabukuru.
Ku munsi wa 8 (tariki ya 12) hakingiwe abagera ku barenga 10,000 barimo abacururiza mu masoko 7 yo mu Mujyi wa Kigali barenga 2000, abatwara amakamyo na bisi (bus) barenga 1127 n’abakora isuku ku muhanda.
Ku munsi wa 9 (tariki ya 13) hakingiwe abarenga 4,464 barimo abakozi 1200 bakorera mu cyanya cyahariwe inganda muri Kigali, abakozi bo mu bigo byigenga bicunga umutekano, abacuruzi, abagize imiryango iharanira inyungu z’abaturage (sosiyete sivile), abagize imiryango itegamiye kuri Leta, irimo n’ishingiye ku myemerere.
Minisitiri w’Ubuzima, Perezida Kagame n’umufasha we barakingiwe
Ubwo yatangizaga iki gikorwa ku rwego rw’igihugu ku bitaro bya Masaka, Minisitiri w’Ubuzima Dr Ngamije Daniel yarakingiwe ndetse ahumuriza abatewe ubwoba n’uru rukingo ko nta ngaruka mbi rufite.
Nyuma y’iminota 30 yari amaze arutewe, Dr. Ngamije yagize ati: “Ubu meze neza. Maze iminota 30 nkingiwe kandi nta ngaruka numva.”
Minisitiri Ngamije yakingiwe ku munsi wa mbere
Ku munsi wa 6 w’iyi gahunda, Perezida wa Repubulika y’u Rwanda, Paul Kagame n’umufasha we, Jeannette Kagame na bo barakingiwe. Iki gikorwa cyabereye ku bitaro byitiriwe Umwami Faisal biri mu mujyi wa Kigali.
Icyo gihe ibiro by’Umukuru w’Igihugu (Village Urugwiro) byagize biti: “Muri gahunda yo gukingira ikomeje hirya no hino mu gihugu aho abarenga 230,000 bamaze gukingirwa Covid-19, Perezida Kagame n’umufasha Jeannette Kagame bakingiriwe ku bitaro byitiriwe Umwami Faisal.”
Perezida Kagame n’umufasha we barakingiwe
Uyu munsi biteganyijwe ko hakingirwa abanyerondo, abatwara abagenzi muri bisi (bus), abatwara amakamyo n’abakorera ibigo byigenda bicunga umutekano, Leta y’u Rwanda ikaba ifite gahunda yo gukingira 60% by’Abaturarwanda kugeza ku musozo w’umwaka w’2022 mu gihe yabona inkingo nk’uko ibiteganya.
Kurikira ibiganiro n’amavidewo binyura kuri Bwiza TV
