Ghana: Abasifuzi bakubiswe iz’akabwana bagirwa intere (Amafoto)

Abasifuzi bo mu gihugu cya Ghana bakubiswe bagirwa intere, nyuma yo gushinjwa kwitwara nabi mu mukino basifuye ejo ku Cyumweru.

Byabaye nyuma y’umukino wahuje ikipe ya Wamanafo Mighty Royals na Bofoakwa Tano FC zombi zo mu kiciro cya kabiri muri Ghana.

Ni umukino warangiye amakipe yombi aguye miswi 0-0.

Nyuma y’uyu mukino abafana ba Wamanafo Mighty Royals yari yakiriye uyu mukino bigamye mu ijwi riranguruye ko bagiye gukubita abasifuzi kugeza bashizemo umwuka, nk’uko ikinyamakuru Sports World Ghana cyabitangaje.

Nyuma y’umukino abafana bigabije ikibuga bahondagura abasifuzi nk’abanyabyaha.

Amafoto yashyizwe kuri Twitter n’umunyamakuru Nuhu Adams wo muri Ghana akana umwe mu banyamakuru ba Siporo b’ibyamamare muri Afurika, yerekana bariya basifuzi bagizwe intere ku buryo hari abari bafite inguma, undi ava amaraso mu mazuru.

Kiriya gitangazamakuru cyavuze ko hari umwe mu basifuzi wakuwemo amenyo abiri.

Si bwo bwa mbere abafana ba Wamanafo Mighty Royals bari bakubise abasifuzi kuko no mu bihe byashize bagiye babakubita babashinja gutuma ikipe yabo itsindwa.

Byitezwe ko Ishyirahamwe ry’Umupira w’amaguru muri Ghana rifatira ibihano bikarishye iriya kipe, nyuma yo kurenga ku mabwiriza ya FIFA ikemerera abafana kureba umukino wayo, barangiza bakanasagarira abasifuzi.

Kurikira ibiganiro n’amavidewo binyura kuri Bwiza TV