Umutoza w’Ikipe y’Igihugu ‘Amavubi’, Mashami Vincent, yanenze cyane igihugu cya Caméroun cyabeshye ko hari abakinnyi batatu b’u Rwanda banduye icyorezo cya COVID-19 nyamara ari bazima.
Umutoza w’Amavubi yabigarutseho nyuma y’umukino waraye uhuje iyi kipe mu ijonjora ryo gushaka itike y’Igikombe cya Afurika kizabera muri Caméroun.
Uyu mukino wabereye kuri Stade ya Japoma i Douala warangiye Amavubi y’u Rwanda aguye miswi na Caméroun 0-0, abura itike yo kwitabira imikino y’Igikombe cya Afurika.
Mu kiganiro Mashami yagiranye n’itangazamakuru, yashimye igihugu cya Caméroun kuba cyabonye itike y’Igikombe cya Afurika kizakira, gusa avuga ko hari ibitaragenze neza bikwiye kunengwa.
Ati: “Ndashimira Cameroun yabonye tike ndetse nk’igihugu kizakira irushanwa, ariko hari ibyo nshaka kuvuga byagakosotse kuko bidakwiye. Ibyabaye mbere y’umukino biratangaje.”
“Twabanje kubwirwa ko hari abakinnyi bacu banduye Covid-19 ariko tujya kwipimisha ahandi dusanga ni bazima. Ibisubizo tumaze kubibona twabizanye dutangazwa no kutubwira ko batari bubyakire.”
Mashami yakomeje ati: “Ni inshuro ya kabiri nyuma y’ibyo bakoze muri CHAN iheruka ubwo babeshyaga ko hari abakinnyi ba Congo Kinshasa banduye kandi bababeshyera. Reka mvuge ko biteye isoni ku gihugu nka Cameroun kizakira irushanwa.”
Abakinnyi b’Amavubi bari babwiwe ko banduye Covid-19 nyamara ari bazima ni Medie Kagere, Sugira Ernest na myugariro Mutsinzi Ange.
Mashami kandi yanenze uburyo umusifuzi yitwaye mu mukino wa Caméroun, ashimangira ko hari aho yagiye arenganya ikipe y’igihugu Amavubi.
Ati: “Imyitwarire y’umusifuzi yadutunguye. Ntabwo twishimiye ibyemezo by’umusifuzi muri uyu mukino. Wagira ngo yari umuturage wo muri iki gihugu.”
