Ikipe ya Simba Sports Club yo muri Tanzania yakatishije itike ya 1/4 cy’irangiza, nyuma yo kunyagira AS Vita Club y’i Kinshasa muri Repubulika Iharanira Demokarasi ya Congo ibitego 4-1.
Amakipe yombi yakinaga umukino wa gatanu ari na wo ubanziriza uwa nyuma wo mu tsinda A.
AS Vita Club y’umutoza Florent IbengĂ© yari hejuru gato ya Simba ku bijyanye no gutindana umupira, gusa iyi kipe y’umutoza Didier Gomes da Rosa ikayirusha ibijyanye no kurema uburyo bwinshi bw’ibitego ndetse no kububyaza umusaruro.
Iminota 45 y’igice cya mbere yatangiye Simba iri imbere n’ibitego 2-1.
Umunota wa 30 w’umukino wari uhagije ngo Umunya-Mozambique, Luis JosĂ© Miquisone, umaze gutsinda ibitego bitatu muri iyi mikino y’amatsinda afungurire Simba amazamu.
Igitego cy’uyu musore cyakurikiwe n’icyo kwishyura AS Vita Club yatsindiwe na Zemanga Soze nyuma y’iminota ibiri, gusa umunya-Zambia Clatous Chama atsindira Simba igitego cya kabiri mbere gato y’uko igice cya mbere kirangira.
Simba yatsinze igitego cya gatatu ku munota wa 66 ibifashijwemo na Rally Bwalya, Clatous Chama atsinda icya kane ku munota wa 84 nyuma yo kwandagaza ba myugariro ba AS Vita Club.
Umunyarwanda Meddie Kagere nk’ibisanzwe yinjiye mu kibuga asimbuye Chrispain Mugalu.
Gutsinda AS Vita Club byahesheje Simba itaratakaza umukino n’umwe mu tsinda itike ya 1/4 cy’irangiza cya CAF Champions, ndetse inizera kuzazamuka mu tsinda ari iya mbere.
Ni nyuma y’uko Al Ahly yo mu Misiri yayiryaga insyataburenge yanganyije na Al Merrick yo muri Sudani ibitego 2-2 bituma igumana amanota umunani mu gihe Simba ifite 13.
Bisobanuye ko Al Ahly iramutse itsinze Simba mu mukino wa nyuma bafitanye yagira amanota 11, zombi zikazamukana muri 1/4 cy’irangiza.
