Ikipe ya Atlético Madrid yongeye korohereza akazi FC Barcelona na Real Madrid bahanganiye igikombe cya shampiyona ya Espagne, nyuma yo gutsindwa na Sevilla igitego 1-0 mu ijoro ryakeye.
Sevilla na Atlético bakinaga umukino w’umunsi wa 29 wa shampiyona wabereye ku kibuga cya Estadio Ramon Sánchéz Pijuan.
Igitego cyo ku munota wa 69 w’umukino cyatsinzwe na myugariro w’umunya-Argentine, Marcos Acunã, cyari gihagije ngo Sevilla ibone amanota atatu yayifashije gukomeza gushimangira umwanya wa kane n’amanota 58.
Atlético Madrid iracyari iya mbere n’amanota 66, ikarusha Real Madrid iyikurikiye amanota atatu. Zombi ziranganya imikino 29 zimaze gukina.
FC Barcelona yo iri ku mwanya wa gatatu n’amanota 62, n’umukino w’ikirarane ihuriramo na Real Valladolid kuri uyu wa mbere.
Bisobanuye ko FC Barcelona iramutse itsinze uyu mukino yafata umwanya wa kabiri n’amanota 65, igasigara irushwa na Atlético inota rimwe.
Ni Atlético mu Ukwakira yayirushaga amanota 10, kandi inafite umukino w’ikirarane.
FC Barcelona ishobora gukuramo amanota yose irushwa na Atlético, mu gihe yayitsinda mu mukino w’umunsi wa 35 wa shampiyona ya Espagne uzabera i Camp Nou ku wa 9 Gicurasi.
Mbere y’aho iyi kipe izaba yabanje guhura n’amakipe arimo Real Madrid bazakina ku wa Gatandatu w’iki cyumweru, Granada, Getafe, Villarreal na Valencia.
Kurikira ibiganiro n’amavidewo binyura kuri Bwiza TV
