Kwibuka 27: Abakinnyi ba PSG bafashe mu mugongo Abanyarwanda

Ikipe ya Paris Saint-Germain yo mu Bufaransa binyuze mu bakinnyi bayo, yifatanyije n’Abanyarwanda mu kwibuka ku ncuro ya 27 Jenoside yakorewe Abatutsi.

Guhera kuri uyu wa Gatatu ni bwo u Rwanda n’Isi yose batangiye icyunamo cy’iminsi 100, bibuka Abatutsi bishwe muri Jenoside yabakorewe mu 1994.

Ikipe ya PSG ibinyujije kuri Twitter yayo, yagize iti: “Twifatanyije n’abavandimwe na bashiki bacu bo mu Rwanda, mu kwibuka Jenoside yakorewe Abatutsi mu 1994.”

Mu mashusho iyi kipe yashyize ku rubuga rwayo rwa Twitter, hagaragaramo bamwe mu bakinnyi bayo batambutsa ubutumwa bufata mu mugongo Abanyarwanda.

Ni amashusho agaragaramo abakinnyi batandukanye b’iyi kipe, barimo Umunya- Espagne Pablo Sarabia usubiramo buriya butumwa PSG yanditse kuri Twitter.

Abandi bagaragara muri aya mashusho barimo myugariro Abdou Diallo, umunya-Espagne Juan Benart, umunya-Brésil Rafinha Alcàntara cyo kimwe na rutahizamu Kylian Mbappé.

Diallo yumvikana agira ati: “Duhaye icyubahiro abarenga miliyoni imwe bapfuye twibuka, kandi turashima imbaraga n’ubutwari by’abacitse ku icumu.”

Rafinha na Bernart bakomerezaho bagira ati: “Mu myaka 27 ishize, ukwihangana k’u Rwanda, gukura no guhinduka kwarwo, ni igihamya cy’umwuka w’ubumuntu buhoraho.”

Mpappé abasoreza agira ati: “Twibuke twiyubaka!”

PSG isanzwe ari umufatanyabikorwa w’u Rwanda kuva mu mwaka wa 2019, mu kumenyekanisha ubukerarugendo bwarwo binyuze muri gahunda ya Visit Rwanda.

Ku irariki nk’iyi ya 07 Mata 2020 ubwo u Rwanda rwibukaga Jenoside yakorewe Abatutsi ku nshuro ya 26, na bwo iyi kipe y’i Paris yafashe Abanyarwanda mu mugongo binyuze mu bakinnyi bayo nka Mbappé, Sarabia, Ander Herera, Idris Gana Guèye na Eric Maxim Choupo-Moting.

Kurikira ibiganiro n’amavidewo binyura kuri Bwiza TV