Rutahizamu Meddie Kagere yafashije ikipe ye ya Simba Sports Club kunyagira Mutibwa Sugar ibitego 5-0, mu mukino wa shampiyona ya Tanzania.
Ku gicamunsi cy’Ejo ku wa Gatatu ni bwo Simba yari imaze igihe ihugiye mu mikino ya CAF Champions league, yari yakiriye Mutibwa Sugar kuri Stade ya Benjamin Mkapa i Dar es Salaam.
Rutahizamu Meddie Kagere yatsinze ibitego bibiri muri bitanu ikipe ye yatsinze.
Kagere yanyeganyeje inshundura ku munota wa 43 atsinda igitego cya gatatu, mbere yo gutsinda ikindi gitego cyari icya kane cya Simba ku munota wa 51 w’umukino.
Ni Kagere wari wongeye kugirirwa icyizere cyo kubanza mu kibuga nk’icyo yaherukaga kugirirwa ku mukino wa CAF Champions league Simba yatsinzwemo na Al Ahly igitego 1-0, nyuma y’igihe kirekire cyari gishize abanza ku ntebe y’abasimbura.
Ibindi bitego bya Simba byatsinzwe na Clatous Chama wafunguye amazamu ku munota wa 9 w’umukino, mbere y’uko Rally Bwalya atsinda icya kabiri nyuma y’iminota itandatu.
Simba yatsinze agashinguracumu ku munota wa 73 w’umukino ibifashijwemo n’umunya-Mozambique Luis Jose Miquisone.
Gutsinda uyu mukino byongereye Simba amahirwe yo kwegukana igikombe cya shampiyona kuko yagumanye umwanya wa kabiri n’amanota 49, irushwa na Young Africans amanota abiri.
Cyakora cyo iyi Simba imaze gukina imikino 21 ya shampiyona mu gihe Yanga imaze gukina 24, ibisobanura ko iramutse itsinze ibirarane bitatu ifite yahita igira amanota 58.
Gutsinda ibitego bibiri ku rundi ruhande byatumye Kagere yuzuza ibitego 11 amaze gutsinda muri shampiyona y’uyu mwaka, bikamugira uyoboye abamaze gutsinda ibitego byinshi.
