Ingabo ziri mu butumwa bw’Umuryango w’Abibumbye bwo kubungabunga amahoro n’umutekano muri Repubulika ya Demukarasi ya Congo, MONUSCO, zivuga ko kuva mu mwaka w’2019 umubare w’imitwe yitwaje intwaro ikorera mu burasirazuba bw’igihugu wavuye ku 3000 ugera ku 120 mu mwaka w’2020.
Ibi byatangajwe na Gen. Thierry Lion wari uhagarariye umuyobozi w’ingabo z’Umuryango w’Abibumbye ziri mu butumwa bw’amahoro muri RDC (MONUSCO), mu kiganiro n’itangazamakuru cyabereye mu mujyi wa Goma tariki ya 21 Mata 2021.
Gen. Lion yavuze ko kugabanyuka gukomeye kw’umubare w’imitwe yitwaje intwaro mu burasirazuba bwa RDC bwagizwemo uruhare n’umutwe wihariye w’ingabo za MONUSCO witwa FIB (Force Intervention Brigade) wongereye imbaraga ingabo zari zisanzwe ziri ku rugamba rwo kurindarura.
Uyu Mufaransa yanenze abakomeje kwamagana ingabo za MONUSCO bazishinja kurebera ubwicanyi bukomeje gukorerwa mu burasirazuba bw’igihugu, birengagije ko icyabajyanyeho ari kubungabunga no kugarura amahoro n’umutekano.
Muri aba bamagana ingabo za MONUSCO harimo abamaze iminsi birara mu mihanda no ku biro by’izi ngabo nko mu mujyi wa Beni, basaba ko zabavira mu gihugu.
Birasa n’aho Gen. Lion yatangaje iyi mibare kugira ngo anyomoze aba bamaze iminsi bashinja MONUSCO kutubahiriza inshingano zayo, akavuga ko icyo bashinjwe ari ukurinda abasivili n’ibikorwa by’igihugu.
Ariko kandi mu minsi ishize, Umuyobozi wa MONUSCO, Bintou Keita aherutse gutangaza ko ingabo ziri mu butumwa bw’amahoro zigiye kongererwa imbaraga kugira ngo zirusheho guhangana n’iyi mitwe yitwaje intwaro.
Kurikira ibiganiro n’amavidewo binyura kuri Bwiza TV
