Ikipe ya Rayon Sports ibifashijwemo na Hértier Luvumbu cyo kimwe na Blaise Nishimwe, yarangije imikino ibanza iyoboye itsinda B nyuma yo gutsinda Rutsiro FC ibitego 2-0.
Rutsiro yari yakiriye Rayon Sports mu mukino w’umunsi wa gatatu wo mu tsinda B wabereye kuri Stade Umuganda.
Hértier Luvumbu utari waragaragaye mu mukino Rayon Sports yatsinzemo Gasogi igitego 1-0 ndetse n’uwo yatsinzwemo na Kiyovu ibitego 3-2, yayifunguriye amazamu ku munota 28 w’umukino, amakipe yombi ajya kuruhuka iri imbere n’igitego 1-0.
Nyuma y’iminota myinshi y’igice cya kabiri yaranzwe no gusatira ku ruhande rwa Rutsiro, Rayon Sports yashimangiye intsinzi yayo ku munota wa 90 ibifashijwemo na Blaise Nishimwe.
Gutsinda Rutsiro byafashije Rayon Sports kurangiza imikino yo mu tsinda iri ku mwanya wa mbere n’amanota atandatu.
Gasogi United yatsinze Kiyovu Sports yahise ifata umwanya wa kabiri n’amanota ane inganya na Rutsiro mu gihe Kiyovu Sports iri ku mwanya wa nyuma n’amanota atatu.
