Perezida w’u Burundi, Evariste Ndayishimiye, yaburiye abaraye bagize uruhare mu bwicanyi bwaguyemo abantu umunani i Muramvya, avuga ko uwo bizagaragara ko yabugizemo uruhare agowe.
Ku mugoroba w’Ejo ku Cyumweru ni bwo abitwaje intwaro bagabye igitero ku modoka enye zirimo Bisi ya sosiyete itwara abagenzi ya Volcano, ku muhanda uva mu mujyi wa Muramvya ugana i Bujumbura.
Minisiteri y’Umutekano w’Imbere mu Burundi ibinyujije ku rubuga rwayo rwa Twitter, yavuze ko abakoze buriya bwicanyi ari abajura bitwaje intwaro.
Amakuru avuga ko mu bishwe harimo Onesphore Nizigiyimana wari ufite ipeti rya Colonel mu ngabo z’u Burundi, ndetse n’umukozi wa Banki Nkuru y’u Burundi.
Perezida Ndayishimiye abinyujije ku rukuta rwe rwa Twitter, yabwiye imiryango yabuze abayo ko ibiri kuba ari ibigeragezo, gusa aha gasopo abakomeje gukora ubugizi bwa nabi mu gihugu cye.
Ati: “Tubabajwe n’abambuzi baraye bongeye guhekura u Burundi. Ibigeragezo ntibizareka kubaho, ariko aragowe uwo bizaturukaho. Abagizi ba nabi bose babereyeho guhanwa. Twihanganishije imiryango yabuze abayo.”
Ubwicanyi bwaraye bukoreye i Muramvya bwabaye nyuma y’iminsi mike muri Komine Rusaka y’intara ya Mwaro ihana imbibi na Muramvya habereye ubundi bwicanyi bwaguyemo abantu barindwi, gusa ababukoze bakaba bataramenyekana.
