Ishyaka ry’abadasigana UPRONA ryafashe umwanzuro wo kwirukana abagabo batatu barimo uwahoze ari visi-perezida ku butegetsi bwa Pierre Nkurunziza mu Burundi, Gaston Sindimwo kuri ubu akaba ari umudepite. Mu bandi UPRONA yeretse umuryango usohoka harimo uwahoze ari umusenateri, Anicet Niyongabo na Ambasaderi Isidore Mbayahaga. Aba VOA ivuga ko bazize gusebya iri shyaka, kurisiga icyasha no gusebya inzego nkuru zaryo. Ni icyemezo cyashyizweho umukono na Abel Gashatsi, uyobora UPRONA akaba n’umuyobozi wungirije w’inteko ishinga amategeko y’ u Burundi ndetse na Prosper Bazombanza, visi-perezida ku butegetsi bwa Evaritse Ndayishimiye kimwe n’abandi banyamuryango. Umunyamabanga Mukuru wa UPRONA, Olivier Nkurunziza yabwiye VOA dukesha aya makuru ko iki cyemezo cyafashwe na komite nkuru y’ishyaka yabaye mu ijoro ryo kuwa 11 Gicurasi 2021 mu ijoro. Mu ibaruwa ye, Gaston Sindimwo yari aherutse gutangaza ko yasabye Minisitiri w’Ubutegetsi bw’Igihugu kubahuza n’abayoboye ishyaka kuko hari ukurebana ay’ingwe. Yavuze ko abayoboye UPRONA iki gihe banyereje umutungo kandi ngo bayoboje inkoni y’icyuma. Kurikira ibiganiro n’amavidewo binyura kuri Bwiza TV
