Ibindi bihugu bitatu byo muri Afurika birimo umuturanyi w’ u Rwanda mu Burengerazuba, Repubulika Iharanira Demukarasi ya Congo, Algeria na Nigeria – ubu byatahuye ubwoko bwa coronavirus bwo mu Buhinde, nkuko Dr Ngoy Nsenga wo mu ishami rya ONU ryita ku buzima (OMS/WHO) yabibwiye BBC. Uko kwemezwa n’umukozi wo muri OMS gutumye ibihugu byo muri Afurika biba birindwi bimaze gutahura ukwo kwihinduranya kwa coronavirus kuzwi nka B.1.617. Ubushakashatsi bw’ibanze bugaragaza ko ubu bwoko bwa Covid-19 bukwirakwira byoroshye cyane kurusha andi moko y’iyi virusi. Dr Nsenga, uhuza ibikorwa bya OMS byo kurwanya Covid-19 muri Afurika, yavuze ko nta yandi makuru afite ku mubare w’abashya babonetse banduye ubwo bwoko bwa Covid-19 bo muri DR Congo, Algeria na Nigeria. Yavuze kandi ko nta n’amakuru afite ku ngendo baba baherutse gukora. Ibihugu bine byo muri Afurika byari bisanzwe byaremeje ko byagaragawemo ubwoko bwa Covid-19 buzwi ku izina rya B.1.617, abo byabusanganye bose bakaba bari bafite aho bahuriye n’ingendo za vuba aha mu Buhinde. OMS iherutse gushyira mu cyiciro cy'”ubwoko [bwa Covid] buteje impungenge ku isi” uko kwihinduranya kwa coronavirus kwabonetse bwa mbere mu Buhinde mu kwezi kwa cumi mu 2020. Undi muturanyi w’ u Rwanda mu majyaruguru, Uganda nayo yari iherutse gutangaza ko yabonye umurwayi umwe w’ubu bwoko bwa Coronavirus bumaze guhitana abatari bake mu Buhinde. Kurikira ibiganiro n’amavidewo binyura kuri Bwiza TV
