Ikipe Real Madrid yo mu gihugu cya Espagne, imaze gutangaza ko yatandukanye n’Umufaransa Zinedine Zidane wari umutoza wayo mukuru.
Umutoza Zidane ni we wafashe icyemezo cyo gutandukana na Madrid nk’uko iriya kipe yabitangaje ku rubuga rwayo.
Iti: “Magingo aya ni igihe cyo kubaha icyemezo cye kandi tukamwereka ko twubaha ubunyamwuga bwe, ukwitanga n’urukundo yagaragaje muri iyi myaka yose.”
Real Madrid yunzemo ko Zidane azahora ari umuntu w’agaciro kanini muri Real Madrid, kandi ibigwi afite muri iriya kipe bikaba birenze kuba yarayikiniye no kuba yarayibereye umutoza.
Iti: “Azi ko ari ku mutima wa Real Madrid ndetse ko Real Madrid izahora ari urugo rwe.”
Zinedine Zidane yatandukanye na Real Madrid, nyuma yo kunanirwa kuyihesha igikombe na kimwe mu mwaka w’imikino ushize.
Igikomeye uyu mutoza yagejeje kuri iyi kipe ni ukuyihesha umwanya wa kabiri muri shampiyona ya Espagne, no kuyigeza muri 1/2 cy’irangiza cya UEFA Champions league yasezerewemo na Chelsea.
Mu mwaka w’imikino ushize bwo Zidane yari yahesheje Real Madrid igikombe cya shampiyona ya Espagne, nyuma yo kuyigarukamo muri Gicurasi 2019 asimbuye Santiago Solari na we wari wasimbuye Julen Lopetegui bombi byari byananiye.
Zidane yagarutse muri Real Madrid nyuma y’uko muri Kamena 2018 yari yayisezeyemo, amaze kuyihesha ibikombe 9 mu myaka ibiri n’igice, birimo UEFA Champions league eshatu zikurikiranya.
Byari byitezwe ko nta gihindutse umutoza Zinedine Zidane asimburwa n’Umutaliyani Massimiliano Allegri, gusa uyu mutoza yamaze gusubira muri Juventus yahoze atoza.
Abatoza batatu bahabwa amahirwe yo kuba basimbura Zidane barimo Antonio Conte, RaĂąl Gonzalez na Xabi Alonso.
Kurikira ibiganiro n’amavidewo binyura kuri Bwiza TV
