Cassien Ntamuhanga watorotse gereza yo mu Rwanda mu 2017 yafatiwe muri Mozambique nk’uko byemezwa n’abo mu ishyaka rye rya politiki gusa bakavuga ko batazi niba yaba agifungiwe muri icyo gihugu. Itangazo ryasohowe n’ishyaka Rwandan Alliance for the National Pact – Abaryankuna, Ntamuhanga ari mu bashinze, rivuga ko yafashwe na polisi ku cyumweru i Maputo muri Mozambique. Ni mu gihe Umuvugizi wa Polisi mu Mujyi wa Maputo, Leonel Muchina, yabwiye BBC ko azasubiza iyi baruwa binyuze mu nyandiko. Abanyarwanda babiri baba i Maputo batifuje gutangazwa imyirondoro babwiye BBC ko bamenye amakuru y’uko Ntamuhanga yafashwe muri wikendi ishize, ariko “batazi niba ari ho agifungiye.” Constance Mutimukeye uvuga ko ari mu bayobora ishyaka ry’Abaryankuna, yabwiye BBC ko Ntamuhanga yafashwe, ubu bari kwamagana ko yoherezwa mu Rwanda. Avuga ko kuba Ntamuhanga yari impunzi bihagije ngo ” atoherezwa mu Rwanda.” Nta ruhande rw’ u Rwanda ruragira icyo rutangaza kuri iki kibazo. Ntamuhanga w’imyaka 39 Mu kwezi ka kane 2014 yaburiwe irengero, nyuma y’iminsi polisi imwerekana hamwe na Kizito Mihigo, Jean Paul Dukuzumuremyi na Agnes Niyibizi baregwa gutegura ibikorwa by’iterabwoba. Ntamuhanga yakatiwe gufungwa imyaka 25 mu 2015. Yaje gutoroka gereza ya Mpanga mu Rwanda mu kwezi kwa 11/2017 akoresheje imigozi, nk’uko byavuzwe n’urwego rushinzwe imfungwa n’abagororwa mu Rwanda. Mu rubanza rw’iterabwoba rwo muri Gicurasi 2021, uyu yahawe igihano cyo gufungwa imyaka 25 ku byaba by’iterabwoba mu rundi rubanza. Kurikira ibiganiro n’amavidewo binyura kuri Bwiza TV
