Gen Katumba Edward Wamala uri mu basirikare bakomeye mu gisirikare cya Uganda (UPDF) mu gitondo cyo kuri uyu wa Kabiri tariki 1 Kamena 2021 yarashwe n’abagizi ba nabi bataramenyekana ajyanwa kwa muganga ikitaraganya mu gihe umushoferi n’umukobwa we bo bahasize ubuzima. Gen Wamala asanzwe ari Minisitiri w’Umurimo n’Ubwikorezi muri Uganda; ndetse akaba anahagarariye UPDF mu nteko Ishinga Amategeko ya 11. Amakuru avuga ko imodoka ya Gen Wamala yarashwe n’abagizi ba nabi bane bamutegeye mu gace ka Kisaasi mu majyaruguru y’Umujyi wa Kampala muri Diviziyo ya Kawempe, ahahana imbibi na Ntinda. Daily Monitor yavuze ko Gen Katumba Wamala yari mu modoka imwe n’umukobwa we, Brenda Nantongo ndetse n’umushoferi we, Haruna Kayondo bombi bahise bapfa. Amashusho yasakaye ku mbuga nkoranyambaga yerekana uriya mujenerali agenda n’amaguru ariko imyambaro ye yuzuye amaraso cyane ahagana ku maboko no ku ntugu ari nako abantu bari benshi baje kureba ibibaye. Amakuru ataremezwa n’Igisirikare cya Uganda avuga ko Gen Wamala yahise ajyanwa mu ivuriro ryitwa MALCOM ikitaraganya kugira ngo yitabweho n’abaganga byihuse nyuma ajyanwa mu Bitaro bya Nakaselo gusa ubu akaba ari kuvurirwa mu Bitaro byitwa Medipal International i Kampala aho yasuwe n’Umuyobozi w’Inteko ishinga Amategeko ya Uganda, Jacob Oulanyah. Gen Katumba Wamala Gen Katumba Wamala yavutse kuwa 19 Ugushyingo 1956 ahitwa Bweeza mu Karere ka Kalangala mu Kirwa cya Ssese. Yabaye mu gisirikare cya UNLA nyuma mu 1986 yiyunga kuri NRA ya Museveni. Yabaye Umugaba Mukuru w’Ingabo za Uganda kuva mu 2013 kugeza mu 2017. yanayoboye kandi Ingabo za Uganda zirwanira ku butaka kuva mu 2005 kugeza mu 2013. Uyu mugabo udakunze kumvikana yiremereje nk’uko bimenyerewe kuri bamwe mu bajenerali bo muri UPDF, yanayoboye Polisi ya Uganda kuva mu 2001 kugeza mu 2005.
