Byibuze abantu 15 kuri uyu wa Kabiri, biciwe mu gitero cy’ubwiyahuzi cya bombe cyagabwe ku Kigo cya Gisirikare mu murwa mukuru wa Somalia, Mogadishu.
Abayobozi bari ku Bitaro bya Madina, aho uwahaye amakuru Reuters yabaze imirambo, bemeje ko koko aba bantu biciwe mu gitero cyagabwe mu gitondo ku kigo cya gisirikare.
Nta mutwe n’umwe wahise wigamba iki gitero, ariko birakekwa ko cyagabwe n’abarwanyi b’umutwe wa Al Shabab ukunze kugaba ibitero nk’ibi by’ubwiyahuzi muri iki gihugu.
Umwe mu basirikare ba Somalia, Odawaa Yusuf Rage, yabwiye itangazamakuru rya leta ko 10 mu bantu bari bari kwinjizwa mu gisirikare bishwe, naho abagera kuri 20 bagakomereka ubwo umwiyahuzi wari wihambiriyeho ibisasu yiturikirizaga kuri bariyeri yinjira mu kigo cy’imyotozo ya gisirikare kitiriwe General Degaban.
Kurikira ibiganiro n’amavidewo binyura kuri Bwiza TV
