Mu ntangiriro z’iki cyumweru, mu mukwabu Polisi y’u Rwanda yakoreye mu turere twa Gasabo, Gicumbi na Rwamagana yayifatiyemo abagabo batatu bafite ibiyobyabwenge by’ubwoko butandukanye birimo n’urumogi.
[ad id=”44145″]
Muri Nyarugenge hafatiwe uwitwa Hakizimana Janvier afite bule 2900 z’urumogi, afatiwe mu murenge wa Nyamirambo. Naho mu murenge wa Nyankenke ho mu karere ka Gicumbi hafatiwe uwitwa Bajyinama Ildephonse afite litiro 160 za Kanyanga.
Mu gihe mu mukwabu wabereye mu murenge wa Gishali mu karere ka Rwamagana ho hafatiwemo uwitwa Ishimwe Olivier afite bule 95 z’urumogi.
Aba bagabo bose uko ari batatu bafungiwe kuri Sitasiyo za Polisi muri utu turere; ndetse n’ibyo biyobyabwenge ni ho bibitse mu gihe iperereza rikomeje.
Mu butumwa umuyobozi wa Polisi y’u Rwanda mu karere ka Gicumbi, Chief Superintendent of Police (CSP) Dan Ndayambaje yatanze yagize ati “icyo abishora mu biyobyabwenge bakwiye kumenya ni uko inzira zose babinyuzamo babyinjiza mu gihugu tuzizi ku buryo abazakomeza kubikora bazafatwa bakanirwe urubakwiye.
Ku bijyanye n’ububi bw’ibiyobyabwenge ndetse n’ingaruka zo kubyishoramo, yakomeje avuga ko bitera abantu gukora ibyaha birimo gukubita no gukomeretsa, gufata ku ngufu, n’ihohoterwa rishingiye ku gitsina; bityo asaba buri wese kunywa no gucuruza ibyemewe n’amategeko bidafite ingaruka mbi ku buzima bwe.
CSP Ndayambaje yibukije ko igifatwa nk’ikiyobyabwenge ari ikinyobwa cyose kirengeje igipimo cya mirongo ine na gatanu ku ijana (45%) bya alukoro ndetse n’ikindi cyose kitujuje ibyangombwa byo kuba cyanyobwa nk’uko biteganywa n’ingingo ya 24 y’Umutwe wa mbere w’Itegeko N°03/2012 ryo ku wa 15/02/2012 rigena imikoreshereze y’ibiyobyabwenge n’urusobe rw’imiti ikoreshwa nka byo mu Rwanda.
Umuvugizi wa Polisi y’u Rwanda mu mujyi wa Kigali, Superintendent of Police (SP) Emmanuel Hitayezu yagize ati:” Abanywa ibiyobyabwenge bamenye ko bashyira ubuzima bwabo mu kaga kuko bikururira uburwayi butandukanye burimo ubufata mu myanya y’ubuhumekero. Ikindi kandi, amafaranga abishorwamo apfa ubusa kubera ko iyo bifashwe birangizwa, kandi ubifatanwe arafungwa ndetse agacibwa n’ihazabu.”
[ad id=”44145″]
SP Hitayezu nawe yasabye abaturage muri rusange kwirinda ibiyobyabwenge by’ubwoko bwose no kugira uruhare mu kurwanya ikoreshwa n’itundwa ryabyo batanga amakuru yerekeye ababyishoramo.
Kanda hano ujye ubona amakuru yihuse kandi kugihe kuri Facebook no kuri twitter
@Bwiza.com
