Perezida Samia Suluhu Hassan wa Repubulika ya Tanzania, yamaze kugera mu gihugu cy’u Burundi aho yatangiye uruzinduko rw’iminsi ibiri.
Mu kanya kashize ni bwo Perezida Samia yageze ku kibuga mpuzamahanga cy’indege cyitiriwe Melchior Ndadaye i Bujumbura, yakirwa na Visi-Perezida w’u Burundi, Bazombanza Prosper.
Perezidansi ya Tanzania ku munsi w’ejo yatangaje ko Perezida Samia Suluhu asura u Burundi ku butumire bwa mugenzi we, Evariste Ndayishimiye, byitezwe ko bagirana ibiganiro.
Uru ruzinduko kandi rurasiga u Burundi na Tanzania basinyanye amasezerano y’ubufatanye mu nzego zitandukanye afitiye inyungu ibihugu byombi.
U Burundi bubaye igihugu cya gatatu Samia asuye kuva yagera ku butegetsi muri Werurwe uyu mwaka asimbuye Dr John Pombe Magufuli yari yungirije, nyuma yo kugirira uruzinduko i Kampala muri Uganda n’i Nairobi mu gihugu cya Kenya.
