Umuyobozi w’itsinda ry’abapolisi b’u Rwanda bari mu butumwa bwa Loni bwo kubungabunga amahoro muri Repububulika ya Centrafrique (MINUSCA), Chief Superintendent of Police (CSP) Innocent Rutagarama Kanyamihigo, yotowe nk’umupolisi w’indashyikirwa w’Ukwezi kwa Nyakanga 2021.
CSP Kanyamihigo ayoboye abapolisi b’u Rwanda 140 bashinzwe kurinda abanyacyubahiro bo muri Centrafrique, abayobozi b’intumwa z’Umuryango w’Abibumbye baba muri iki gihugu ndetse na bimwe mu bikorwaremezo bikomeye byo muri iki gihugu.
Ikinyamakuru cya MINUSCA (ECHO de la Police) mu numero yacyo ya 30 ku rupapuro rwa 28 (Page 28) yasohotse tariki ya 15 Kanama 2021, haragaragara uko CSP Innocent Kanyamihigo n’itsinda ry’abapolisi 140 barimo abagore 22 barimo gusohoza inshingano zabo neza, mu gihe gito cy’amezi 3 bamaze bageze muri kiriya gihugu kuva taliki ya 15 Gicurasi.
ECHO de la Police iragira iti: “Innocent, Umuyobozi w’itsinda ry’abapolisi b’u Rwanda bashinzwe kurinda abanyacyubahiro akomeje kubumbatira imiyoborere myiza n’ubunyamwuga biranga itsinda ayoboye. Iri tsinda ryageze mu butumwa bw’Umuryango w’Abibumbye tariki ya 15 Gicurasi 2021 rigizwe n’abapolisi 140 harimo abagore 22.”
“Umuhate no kwita ku murimo bashinzwe biranga iri tsinda birifasha kuzuza neza inshingano z’ubutumwa bw’Umuryango w’Abibumbye barimo muri Repubulika ya Santarafurika, by’umwihariko uburyo bacungira umutekano abanyacyubahiro bigaragaza imiyoborere myiza ye (CSP Innocent Rutagarama Kanyamihigo).”
Polisi y’Igihugu ku rubuga rwayo yatangaje ko ubusanzwe iri tsinda ry’abapolisi b’u Rwanda rifite inshingano zo kurinda intumwa zihagarariye z’umunyamabanga w’Amuryango w’Abibumbye harimo ahatuye intumwa idasanzwe y’Umunyamabanga Mukuru w’Umuryango w’Abibumbye muri Repubulika ya Centrafrique.
Barinda Perezida w’inteko ishinga amategeko, Minisitiri w’Intebe na Minisitiri w’Ubutabera. Iri tsinda kandi rinakora ibindi bikorwa bihuza abaturage n’abapolisi bari mu butumwa bw’Umuryango w’Abibumbye muri iki gihugu cya Repubulika ya Centrafrique.
Iri tsinda ry’abapolisi b’u Rwanda bamaze amezi atatu gusa muri iki gihugu kuko basimbuye bagenzi babo tariki ya 15 Gicurasi 2021, mbere y’uko aba bapolisi bajya mu butumwa bw’Umuryango w’Abimbye bahabwa impanuro n’abayobozi bakuru muri Polisi y’u Rwanda.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
