Guinée: Perezida Alpha Condé yabereye umuzigo abasirikare bamuhiritse ku butegetsi

Abasirikare bafashe ubutegetsi muri Guinée-Conakry, bari mu bizazane ku cyo bagomba gukoza Perezida Alpha Condé baheruka guhirika ku butegetsi.

AFP dukesha iyi nkuru ivuga ko ikibazo bariya basirikare bafite ari icy’uko bakomeza kumugumana bakirengagiza igitutu bakomeje gushyirwaho n’amahanga abasaba kumurekura, gusa na bwo bagatinya ko ashobora kwihorera.

Aba basirikare barangajwe imbere na Lt Col Mamady Doumbouya bemeye kuzakomeza gucungira umutekano Alpha Condé, gusa icyo bamuteganyiriza ntikizwi.

Hagati aho abanyapolitiki batavuga rumwe n’ubutegetsi bwa Condé basa n’abifuza ko yaguma mu maboko y’abasirikare bamuhiritse ku butegetsi, bijyanye n’uko bafite ubwoba bw’uko asanzwe afitanye ubucuti bukomeye na bamwe mu bategetsi ba Afurika.

Abdoulaye Oumou Sow uvugira ishyaka FNDC ritavuga rumwe n’ubutegetsi, avuga ko Alpha Conde akwiye kuguma mu maboko y’abasirikare, ku mpamvu z’umutekano.

Cellou Dalein Diallo wigeze kuba Minisitiri w’Intebe ya Guinée-Conakry, we yabwiye AFP ko kurekura Conde bishobora guteza imvururu mu gihugu.

Perezida Alpha Condé aheruka kubwira intumwa z’umuryango w’ibihugu bya Afurika y’Uburengerazuba (CEDEAO) ko yahitamo kwicwa aho kugira ngo arekure ubutegetsi.

Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]