Perezida wa Repubulika, Paul Kagame, yishimiye intsinzi y’ibitego 3-1 ikipe ya Arsenal yihebeye yakuye kuri Tottenham Hotspur, ashimira buri wese wayigizemo uruhare.
Arsenal ku mugoroba wo ku cyumweru yari yakiriye Tottenham i Emirates Stadium, mu mukino w’umunsi wa gatandatu wa shampiyona y’Abongereza.
Ni amakipe yombi asanzwe ahurira mu majyaruguru y’umujyi wa London, ikaba impamvu nyamukuru umukino wayo uba ari ibicika.
Iminota 33 y’uyu mukino yari ihagije ngo Arsenal yawutangiye yataka cyane ibe yamaze kwizera intsinzi.
Iyi kipe y’umutoza Mikel Arteta yafunguye amazamu ku munota wa 12 w’umukino ibifashijwemo na Emile Smith Rowe, ku mupira yari aherewe mu rubuga rw’amahina na Bukayo Saka.
Nyuma y’iminota 15 Arsenal yatsinze igitego cya kabiri biciye kuri Kapiteni wayo, Pierre-Emerick Aubameyang, ku mupira yari ahinduriwe na Smith Rowe.
Byari mbere y’uko Bukayo Saka atsinda igitego cy’intsinzi cyo ku munota wa 33 w’umukino, nyuma yo gucenga ba myugariro ba Tottenham agatereka umupira mu nguni y’izamu.
Ikipe y’umutoza Nuno EspĂrito Santo nyuma yo kwiharira igice cya kabiri cy’umukino, yabonye impozamarira ku munota wa 79 biciye ku munya-Koreya y’Epfo Heung-min Son.
Perezida Kagame abinyujije kuri Twitter ye, yagaragaje ko yanyuzwe n’uko Arsenal yitwaye muri uriya mukino, ashimira abagize uruhare mu ntsinzi yayo.
Ati: “Ishimwe aho rikwiye…Nimwishyuke Arsenal, umutoza, abakinnyi ndetse byimazeyo…abafana!!! Ibintu byose byagenze neza uyu munsi. Amahirwe masa muri buri mukino.”
Perezida Kagame yashimiye Arsenal, mu gihe yari yayinenze ku munsi wa mbere wa shampiyona ubwo yatsindwaga na Brentford ibitego 2-0, yemwe igakomereza mu mujyo wo gutsindwa mu mikino yayihuje na Chelsea na Manchester City.
Nyuma yo gutsinda imikino itatu yikurikiranya, Arsenal yavuye ku mwanya wa nyuma ku rutonde rw’agateganyo rwa shampiyona y’Abongereza igera ku mwanya wa 10 n’amanota icyenda.
Arsenal irarushwa amanota atanu na Liverpool ya mbere.
Iyi kipe kandi irarushwa amanota ane na Man City, Chelsea, Manchester United na Everton zikurikiye Liverpool. Arsenal iranganya amanota na Brentford ya cyenda, mu gihe Aston Villa ya munani iyirusha inota rimwe.
