Umunya-Argentine Sergio Kun Aguëro ukinira ikipe ya FC Barcelona, agiye guhagarika gukina umupira w’amaguru imburagihe kubera ikibazo cy’umutima.
Mu kwezi gushize ni bwo Aguëro yagize ikibazo cy’umutima nyuma yo gusohoka mu kibuga ababara mu gituza, mu mukino FC Barcelona yanganyirijemo na Alaves igitego 1-1.
Ni Aguëro wari umaze gukinira iyi kipe yo muri Espagne imikino itanu yonyine kubera imvune.
Catalunya Radio mu minsi ishize yatangaje ko ikibazo cy’ubuzima uyu rutahizamu wahoze akinira Manchester City yo mu Bwongereza gishobora gutuma asezera imburagihe ku mupira w’amaguru, bijyanye n’uko ubuzima bwe bukomeje kujya ahabi kurushaho.
Umunyamakuru Gerard Romero yatangaje ko byitezwe ko Aguëro agomba gusezera ku mupira w’amaguru, icyemezo azatangaza mu cyumweru gitaha mu kiganiro n’itangazamakuru.
