Perezida Yoweri Kaguta Museveni wa Uganda yamaze kugera i Dar es Salaam mu gihugu cya Tanzania, aho yitabiriye inama yiga ku mushinga w’ibitoro Uganda na Tanzania bifitanye.
Museveni watangiye uruzinduko rw’iminsi itatu muri iki gihugu, yakiriwe na Perezida Samia Suluhu Hassan wamutumiye.
Inama Perezida Museveni yitabiriye igamije gushishikariza abikorera bo mu bihugu bya Uganda na Tanzania gushora imari muri uriya mushinga.
Muri Mata uyu mwaka ni bwo Uganda na Tanzania byashyize umukono ku masezerano atatu y’ingenzi agamije guteza imbere urwego rwa Uganda rw’ubucukuzi bw’ibikomoka kuri Peteroli na gaz (gas).
Ni amasezerano arebana no kubaka umuyoboro wa 1443km wo kuvoma ibitoro bya Uganda mu kibaya cya Albertine basin mu burengerazuba bwa Uganda, ubijyana ku cyambu cya Tanga cyo muri Tanzania kiri ku nyanja y’Ubuhinde.
Numara kubakwa, uyu muyoboro w’ibitoro w’agaciro ka miliyari 3.5 z’amadolari y’Amerika uzaba ari wo wa mbere muremure ku isi unyuramo ibitoro bitunganyije.
Byitezwe ko uyu muyoboro uzazana inyungu mu mibereho no mu bukungu ndetse n’inyungu ku karere, ugatanga akazi ku bantu bigereranywa ko bagera ku 10,000 mu gihe uzaba urimo kubakwa no mu gihe uzaba watangiye gukora.
