Minisitiri w’Ubuzima, Dr Daniel Ngamije avuga ko kudohoka ku ngamba zo kwirinda Coronavirus byagize uruhare mu gutuma ubwandu bwa Covid-19 bwiyongera mu gihugu hose, atunga agatoki Umujyi wa Kigali ko ari wo ntandaro y’iki kibazo. Dr Ngamije yabitangarije kuri televiziyo y’igihugu kuri uyu wa 20 Ukuboza 2021, avuga ko kuba abantu baradohotse ku ngamba zo kwirinda Coronavirus bigaragarira buri wese, ariko ngo byagera i Kigali bikaba ibindi bindi. Uyu muganga ati ” (..) Ikigaragara ni abantu ntibubahiriza amabwiriza cyane cyane muri Kigali. Amabwiriza yatanzwe hari ukuyarengaho.” Ku ngingo yo kudohoka, ati ” Icyitwa Covid nta n’umwe ucyikibuka. Habayeho kudohoka bikabije kandi amafoto yagiye agaragara ku mbuga nkoranyambaga no mu mibare.” Uyu muyobozi avuga ko abaturage badohotse ku ngingo yo guhana intera no kwambara agapfukamunwa, aba bakiyongeraho ababeshya ngo basanze bataranduye Covid-19. Avuga ko ibi byakorwaga mu gihe abantu baburiwe ko Omicron yageze mu Rwanda. Avuga ko ” Bigaragara ko icyorezo cyari kimaze gufata intera yindi ishobora kutuganisha ahabi.” Imibare igaragaza ko kuri ubu mu mujyi wa Kigali, nibura mu bipimo ibihumbi 100 bya COVID-19 bifatwa, habonekamo abantu 46 banduye, bavuye ku bantu batanu (5) mu bihumbi 100 babonekaga mu gihe cy’ibyumweru bitatu bishize gusa. Ibi Minisitiri Ngamije asanga iyi mibare yerekana ko icyorezo kiri ku muvuduko wo hejuru. Ni ingingo yatumye hashyirwaho amabwiriza mashya ku nshuro zirenze imwe mu cyumweru kimwe.
