Abakinnyi batatu b’ikipe y’igihugu ya Guinée-Conakry, Syli National, bari barasigaye i Kigali; kuri uyu wa Gatatu bamaze kugera i Yaoundé muri Caméroun bahasanze bagenzi babo.
Ku wa Gatanu w’icyumweru gishize ni bwo ikipe y’igihugu ya Guinée yahagurutse i Kigali aho yari imaze iminsi ikorera umwiherero, yerekeza mu gihugu cya Caméroun aho yari yitabiriye imikino y’Igikombe cya Afurika cya 2021.
Syli National ubwo yahagurukaga i Kigali yahasize abakinnyi bayo batatu n’umutoza w’abanyezamu bariho bakurikiranwa n’abaganga, nyuma yo kwandura icyorezo cya COVID-19.
Aba barimo rutahizamu Seydouba Soumah, myugariro Mickael Dyrestam, Amadou Diawara ukina hagati mu kibuga cyo kimwe n’umutoza w’abanyezamu Kémoko Camara.
Uko ari bane berekeje muri Caméroun nyuma yo gukira icyorezo cya COVID-19.
Biteganyijwe ko bariya bakinnyi nyuma yo gusanga babo, bashobora kugaragara ku mukino wa kabiri wo mu tsinda B Syli National izahuriramo na Les Lions de la Teranga ya Sénégal uteganyijwe ku wa Gatanu w’iki cyumweru.
Ni nyuma yo kudakina umukino wa mbere wo mu tsinda Guinée iheruka gutsindamo Malawi igitego 1-0.
