Ikipe y’Igihugu ya Nigeria, The Super Eagles, yasezerewe mu Gikombe cya Afurika cy’Ibihugu kiri kubera muri Caméroun, nyuma yo gutsindwa na Les Aigles du Cartage igitego 1-0.
Amakipe yombi yari yahuriye mu mukino wa 1/8 cy’irangiza wabereye kuri Stade ya Stade Roumdé Adjia mu mujyi wa Garoua.
Igitego cyo ku munota wa 47 w’umukino cya rutahizamu Youssef Msakini ni cyo cyafashije Tunisia gusezerera Nigeria, igera muri 1/4 cy’irangiza.
Iyi kipe yiyongereye kuri Burkina Faso yabigezeho isezereye Gabon kuri penaliti 7-6, nyuma y’uko iminota 120 y’umukino yari yarangiye amakipe yombi anganya igitego 1-1.
Nigeria yarangije uyu mukino ifite abakinnyi 10 mu kibuga bonyine, nyuma y’ikarita itukura yo ku munota wa 64 w’umukino yeretswe Alex Iwobi wari umaze gukorera ikosa rikomeye Msakini.
Iyi kipe yasezerewe mu gihe yari mu makipe ahabwa amahirwe yo kwegukana igikombe cya ririya rushanwa.
Ni nyuma yo kwitwara neza mu mikino y’amatsinda yarangije nta n’umwe itsinzwe, ibiyigira ikipe imwe rukumbi yabigezeho mu yari yitabiriye CAN 2021 yose.
