Pueri Cantores Kabaya yasubiyemo indirimbo ya Padiri Hakorimana mu buryo buryoheye amatwi

Korali y’umuryango w’abana b’abaririmbyi (Pueri Cantores) ikorera muri Paruwasi ya Kabaya muri Diyosezi Gatolika ya Nyundo mu burengerazuba bw’igihugu, yasubiyemo indirimbo Dukumbuye Iwawe yahimbwe na Padiri Hakorimana Jean.

Iyi ndirimbo itunganyijwe mu buryo bw’amajwi n’amagambo (audio & lyrics) yasohotse kuri shene ya YouTube ya Pueri Cantores Kabaya mu gitondo cy’uyu wa 27 Werurwe 2022.

Reba indirimbo hano

Iyi ndirimbo iri mu zisanzwe zirimbwa muri Kiliziya Gatolika mu Rwanda ikubiyemo ubutumwa busobanura uburyo kuba hafi y’Imana ari byiza, kuko bitanga amahoro n’umunezero.

Igira iti: “Turaje Mana, dukumbuye iwawe ngo tuhavome amahoro n’ubusabane utanga iyo tukuri hafi. Turegerana tukaramba, iyo turi kure yawe, tugenda intatane, n’amahoro akaba make. Ngwino mu mitima yacu, uhirukane urwango, ngwino uce amarira yose aturuka ku bawe, cya mu mitima yacu, uyerekeze iwawe.”

Iyi ndirimbo ni iya kane Pueri Cantores Kabaya ishyize ku rubuga rwa YouTube, inyuma y’izirimo Yezu Buzima Bwacu yahimbwe na Padiri Mpayimana Théodore.