Colonel Michel Rukunda uzwi nka Makanika yashinje ingabo za Repubulika ya Demukarasi ya Congo, FARDC, kuba inyuma y’ubwicanyi bumaze igihe kinini bukorerwa ubwoko bw’Abanyamulenge muri teritwari ya Uvira.
Mu kiganiro yagiranye n’umunyamakuru wa Gakondo TV & Radio ivugira Abanyamulenge cyagiye hanze kuri uyu wa 9 Mata 2022, Col. Makanika yagize ati: “Ntabwo twebwe twigeze tugira umugambi wo kurwanya FARDC n’ubwo tuzi neza ko ari yo nyir’intambara, n’ubwo tuzi neza ko ari Leta iri kwica ubwoko bwacu.”
Uyu musirikare watorotse ingabo za Leta mu 2019, asobanura ko nta kibazo gikomeye Abanyamulenge bafitanye n’ubwoko bw’abaturanyi b’Abafulero n’Ababembe bibumbiye mu mitwe ya Mai Mai, ngo ahubwo Leta ni yo yateguye umugambi wo kubarwanya.
Yagize ati: “Ariko Leta itegura umugambi, ishyiramo abaturage b’abaturanyi, ishoramo imbaraga, ibafasha kunyaga. Nta karere ka kamwe mu misozi miremire katasenyutse gasenywe n’iriya mitwe ihagarariwe na Leta.”
Col. Makanika yakomeje avuga ko iyo Abanyamulenge bahuriye mu mutwe wa Twirwaneho batsinze imitwe ya Mai Mai, FARDC ibafasha bakongera kugira imbaraga.
Ati: “Ushobora kuba udashaka kurwana n’umuntu ari ko we ashaka kurwana nawe. […] Abavuga ngo twebwe turwanya FARDC, nta FARDC turwanya ahubwo ni yo iturwanya, ni yo idutera.”
