Mu mezi 5 UPDF-FARDC zakuye ADF mu birindiro yari imazemo imyaka irenga 22

Umugaba w’ingabo za Uganda zirwanira ku butaka, Lt Gen. Muhoozi Kainerugaba, yemeza ko mu mezi atagera kuri atanu izi ngabo zifatanyije n’iza Repubulika ya Demukarasi ya Congo (RDC), FARDC, zirukanye umutwe w’iterabwoba wa ADF mu bice wari umaze imyaka irenga 22 warafashe.

Uyu musirikare yatangaje ko Komanda w’ingabo w’ibikorwa bya ‘Operation Shujaa’ bihuriweho bya UPDF na FARDC, Maj. Gen. Kayanja Muhanga yamumenyesheje ko ingabo zibirimo zamaze kwirukana ADF mu bice byose bagabyemo ibitero.

Yagize ati: “Nakiriye amakuru muri iki gitondo yaturutse kuri Maj. General Kayanja ko ADF yahunze ibice byose twagabyemo ibitero. Ni ukuvuga: Semuliki Bridge, Kambi ya Yua, Belu ya I, iya II n’iya II, Tondoli, Kainama, Boga na Tshabi.”

Gen. Kainerugaba yasobanuye ko bivuze ko UPDF na FARDC zashoboye kwirukana ADF mu birindiro yari imazemo imyaka irenga 22. Ati: “Mu yandi magambo, mu mezi atagera kuri 5 abasirikare ba UPDF na FARDC bahuriye muri ‘Operation Shujaa’ zakuye mu ADF yose mu birindiro yari ifite mu myaka irenga 22.”

Uyu musirikare yakomeje aha ikaze ingabo ziri mu butumwa bw’amahoro bw’Umuryango w’Abibumbye, MONUSCO, zifuza kubafasha. Ati: “Numva ko MONUSCO, ingabo za UN zifuza kudufasha muri iki gikorwa. Duhaye ikaze ubufasha bwabo.”

Izi ngabo zatangiye iki gikorwa cyahawe izina rya ‘Operation Shujaa’ tariki ya 30 Ugushyingo 2021, kubera ibikorwa by’ubugizi bwa nabi abarwanyi ba ADF bari bakomeje mu burasirazuba bwa RDC, banavugwaho kuba inyuma y’ibitero byari bitangiye kugabwa mu murwa mukuru wa Uganda, Kampala.