FARDC yatangaje ko irakomeza kurasa ku barwanyi ba M23 yemeza ko bakwiye imishwaro

Igisirikare cya Repubulika ya Demukarasi ya Congo, FARDC, cyatangaje ko kirakomeza kurasa ku barwanyi b’umutwe witwaje intwaro wa M23 cyemeza ko bakwiye imishwaro.

Mu rukerera rwo kuri uyu wa 27 Mata 2022, FARDC yemeje ko yagabye igitero ku birindiro bya M23 mu gace ka Bugusa gaherereye muri gurupoma ya Jomba, teritwari ya Rutshuru mu ntara ya Kivu y’Amajyaruguru.

Ni igitero kandi cyemejwe na Bertrand Bisimwa uyoboye urwego rwa politiki muri M23, nk’uko bigaragara mu butumwa butatu yatambukije ku rubuga rwa Twitter.

Umuvugizi wa FARDC muri Kivu y’Amajyaruguru, Brig. Gen. Sylvain Ekenge yamenyesheje itangazamakuru ko igitero bagabye ku birindiro bya M23 muri Bugusa kirakurikirwa n’ibindi baragaba ku bindi birindiro bitandukanye.

Ni mu gihe Umuvugizi w’ibikorwa bya gisirikare bya Sokola 2 bibera muri Kivu y’Amajyaruguru, Col. Guillaume Ndjike Kaiko we yavuze ko iki gitero cyatumye abarwanyi bakwira imishwaro, kandi ngo ubushobozi bwa M23 muri iyi mirwano buri kuba buke ugereranyije n’ubw’igisirikare cya Leta.

Iyi mirwano iri kuba mu gihe intumwa za Leta n’abahagariye imwe mu mitwe yitwaje intwaro ikorera kandi ikomoka muri RD Congo bakomeje ibiganiro by’amahoro biri kubera i Nairobi muri Kenya guhera tariki ya 22 Mata 2022. M23 yari yatangiye kubyitabira ariko igitero yashinjwe kugaba ku ngabo tariki ya 23 gituma yirukanwamo.