Igihugu cya Koreya ya Ruguru cyatangaje ko cyabonetsemo abantu ba mbere banduye icyorezo cya COVID-19, gihita gishyiraho gahunda ya guma mu rugo mu gihugu hose.
Koreya ya Ruguru yemeje ko yabonetsemo umurwayi wa mbere wa COVID-19, nyuma y’igihe kirekire yaranze inkunga y’amahanga irimo inkingo mu rwego rwo guhangana na kiriya cyorezo.
Abarwayi ba mbere ba COVID-19 bagaragaye muri Koreya ya Ruguru babonetse mu bipimo byafashwe i Pyongyang ku wa 8 Gicurasi, bigaragaza ko hari abarwayi banduye Virusi yo mu bwoko bwa Omicron izwi nka BA.2.
Itangazamakuru ryo muri Koreya ya Ruguru ryagaragaje buriya bwandu nk’ikiza gikomeye ku gihugu, ibyanatumye ubutegetsi bushyiraho gahunda ya Guma mu Rugo.
Kuri uyu wa Kane Perezida Kim Jong-un yahamagaje inama y’igitaraganya y’ishyaka rye, ategeka ko Koreya yose ishyirwa muri Guma mu Rugo.
Amashusho yashyizwe hanze yerekana Perezida Kim yambaye agapfukamunwa ubwo yari muri iriya nama.
Kuva icyorezo cya COVID-19 cyaduka nta na rimwe Koreya yari yarigeze itangaza ko hari uwacyanduye wagaragaye ku butaka bwayo, gusa Koreya y’Epfo na Leta Zunze Ubumwe za Amerika bari barakunze kubihakana, bijyanye n’uko iki gihugu cyari gisanzwe gikorana ubucuruzi n’u Bushinwa mbere y’uko gifunga imipaka yacyo muri 2020.
Mu zindi ngamba Perezida Kim yashyizeho harimo kuba ingendo zambukiranya intara zigize Koreya ya Ruguru zibujijwe.
